giftar dir byan şah ayran, xisru pirwîz az ḧwadis dir ziman nibut an ḧizirit
Li pirtûka:
Rewzetul Sefa
Berhema:
Mîrza Ebdilqadirê Paweyî (1850-1910)
5 Xulek
263 Dîtin
xusrew lał poş daray lał kemer
bizurg lał bexiş şay gerdûn we feř
yek řo dîş ce ban text zeř nêgar
sertaq cam řêz gişt ama be war
bew tewre zana dest wêş şikest
dersat ce ẍerez lêw ḧesret gest
derdem řemmałan saḧran wêş
muneccêman gişt tełeb kerd we pêş
kerdiş we yaran cew dem řûy xetab
watiş nezer ken gişt we řûy kîtab
î asîb çêşen we cam řêz yawa
taq kesra û cerg ême şikawa
muneccîman gişt sucde berdişan
gişt we řûy kîtab nezer kerdişan
watşan be emir kerîm kar saz
sultanê peyda byen ce ḧêcaz
dinyay dûn temam megêro be ḧerb
ḧukimş řewacen ce şerq ta we ẍerb
ce qaf ta we qaf gişt me’mûr mebo
ce zułim załim cehan dûr mebo
zahêren ḧebîb danay daweren
şefî’ dîwan «yum alimḧişirErebî»en
mu’cêzey ewen we şiko yawan
çûn penîr teř sengiş şikawan
xusrew firawan xofiş ne dił berd
řengiş bî be terḧ ze’feran zerd
axêz kerd û şî we xełwetxane
qapî best ce xełq xwêş û bêgane
bew endêşewe şî ne camey xwab
ser nya we ban muttekay sencab
cew dem xuđawend padşay şahan
hadî meded bexiş gum kerdey řahan
yek melek kyast we dewan dew
we xełwetxane û xwabgay xusrew
firîşte yawa we pay bałînş
lada ce řuxsar perdey mişkînş
watiş ey kesra bo musłiman ber
be xuđa û eḧmed şehadet bawer
bezeyît beyo to be wêt da
ya xo î ’esa marûne pêt da
xusrew sersam mend xeylê xofiş kerd
lerza wêney wełk şanay bad serd
wey tewr da cwab wat bazem, bazem
min her ne xeyał ayîn tazem
melek teşrîf berd melêk xicił mend
xaney xem yaney şadî û zewqiş kend
ḧecab û ḧeras, ḧacêban wêş
we ẍezeb her dû tełeb kerd we pêş
watiş î şexse peř sam û sengî
dêwaney dilêr zenendey cengî
pey çêş qapîtan perêş waz kerden
wêney şêr ḧemłe be min awerden
ḧecab û ḧeras hem ênkar kerdin
sed def’e we tac şa sewgend werdin
watşan beşer naman newyerden
xarc ce qapî guzer nekerden
sał ayende we dewan dew
melek naził bî dîsan we xusrew
watiş musłiman mebî ney cêt da
ya xo î ’esa marûne pêt da
xusrew wat carê muhłet der muhłet
bada buyarûn ladê we ẍefłet
melek ẍayb bî melêk řence řo
ḧecab û ḧeras tełeb kerd ce no
xeylê mukedder ḧasił kerd lêşan
’ezab sextê nimana pêşan
dîsan cew sa’et ce sał sêhem
hem ew firîşte şîrîn e’zem
ḧazir bî ce lay serîr xusrew
şewq řoş pey kerd we tarîke şew
watiş ey kesra bo musłiman ber
be weḧdanyet ḧeq îman bawer
xusrew wat bihêl,bihêl kafîyen
sizam cey fêşter bê ênsafîyen
firîşte ’esa şikest pêşeda
cergiş da we dem mewday nêşeda
emcar bo goş der temaşa kere
neqłen ce xalêd êbin webere
her wextê xusrew xaster ce dara
pa menya we zîn pey seyr sara
dû şexis pêş řû hem swar mebîn
daym ce ḧizûr aşkar mebîn
mewatin xusrew me’lûm padşay
to bendey xuđay emma nek xuđay
xusrew hem be ser êşaret mekerd
be dem her pey wêş her xendeş meberd
yek řo swar bî şah kînekêş
dîsan ew dû şexis be qa’êdey pêş
watşan to wêt bende bwane
wêt be xuđay taq waḧêd mezane
xusrew çûn caran êşaret mekerd
cew dem teẍîrê ferahem awerd
naga ew dû şexis hem sêbqet kerdin
şikayet temam be ḧacêb berdin
ḧacêb şî we ban serîr xusrew
dya dîş ke şa ha ne camey xew
seđay pay ḧacêb xas xidmetkar
ce xaw ẍefłet xusrew kerd bêdar
şa watiş ḧacêb ’eceb namerdî
pey çêş cey xawe min bêdar kerdî
bełê cey xawe ’eceb xawê dîm
her katê zanam we asman şîm
ta melaykan gişt hicûm kerdin
min we asman heftemîn berdin
ta yawan we cay ferxunde weḧdet
we payey serîr baregay ’êzzet
şexsê cew meqam řidayê ce ser
ce ḧizûr ḧeq dehnidey dawer
ḧeq ferma kilîd xezaney zemîn
bider wey şexse we bê qar û qîn
naga to amay min kerdî bêdar
nam ew şexis lêm, nebî aşkar
me’lûmen ew şexis her pêẍemberen
ḧebîb meḧbûb danay daweren
ba beḧis kesra carê bimano
ta ew řo namey ḧezret mewano