dir byan kim şidin ab tufan û kiştî nişsitin dir kuh cudî û bir amdin mixluq az nu bidnya
Li pirtûka:
Rewzetul Sefa
Berhema:
Mîrza Ebdilqadirê Paweyî (1850-1910)
6 Xulek
393 Dîtin
yek řo we ferman danay kirdigar
silsiley seḧab gişt bî tar û mar
sakin bî nałey ře’d her caran
kota bî seylab qetrey emtaran
bułend bî buxar syay tof tem
nûḧ dya, qews qezeḧ dî we çem
ferma henî dił xałî ce xofen
ane nîşaney êntêhay tofen
zemîn hem awiş firû berdewe
beḧir tofanş şeq şeq kerdewe
yek badê ama çûn şemałey şem
beḧir tofanş şeq şeq kerd we hem
zemîn hem awiş firû berdewe
her ewind noşa ta qey kerdewe
ta řefi’ tofan bî aşkara
ferq ser berzan gişt kewt we sara
ferma we qaław ’ałem gişt ẍewren
bişo bizane dinya çi tewren
serzemîn her ca kewtebo we ber
to hem we te’cîl zûd xeber bawer
qaław ce keştî ber’ama we ber
perwaz kerd ama taw međa beser
teqdîr murdarê bî be dûçarş
biřya nay taqet sebir û qerarş
her ta zehir mar merdarş kerd noş
ferman ḧezret nûḧ kerd feramoş
ferma ta dinyan her řû sya bo
řozîş ce cîfey bed muheya bo
cew dima ferman da we kemûter
watiş to bişo zûd xeber bawer
kemûter we cext fiře da we bał
berşî ce keştî wêney bay şemał
dîş aw nemenden ce ser dyaran
kewten we sara ferq eşcaran
bergê ce zeytûn biřî we mênqar
berdiş we xidmet şay wala tebar
dûbare hem nûḧ ferma kemûter
îmcarîç bişo, mudara meker
du’a kerd perêş ta ke azad bo
wat ḧubbit ne dił merdum zyad bo
daym her metbû’ tebi’ mexlûq bay
we lay şay řezzaq saḧêb merzûq bay
ferma sa bişo xuđat bo yawer
tekahul meker zûd xeber bawer
dîsan kemûter we bê qîl û qał
berşî ce keştî şeqqe da we bał
dya dîş berzan, herd û berd û kaw
yekser muḧtacen we yek qetre aw
be’zê gił û xak we naxun berdiş
ta ke bew řenge nûḧ ḧałî kerdiş
naxuđa keştîş tekan da we çep
horkêşa lenger we şadî û tereb
keştî bew mexlûq zumre giştewe
aramî ce ban koy cûd nîştewe
ce may muḧeřřem yewm ’aşûra
kerdişan xeyał êradey seḧra
mexlûqat yekser ber’aman we ber
kerdin şukiraney dehnidey dawer
çêş kerûn te’rîf zewq û şadîşan
řoşnî besat dinyay mawî şan
ce zewq aheng mewatit yekser
taze peyda bîn ce betin mader
daman koy cûd ce guzergaşan
yekser gişt bînay şaran nyaşan
ẍerez, ew cage gişt bî we caşan
temam bî yatax zêd û mawaşan
axir xuđawend bê çend û çûnî
naził kerd pêşan derd ta’ûnî
ẍeyr ce heşt nefer ehil û beyt nûḧ
baqî gişt qabiz kerdiş qebiz řûḧ
nûḧ û sam û ḧam, yafis her çwar
çarum zewceşan mendin berqerar
heftad û dû ten «dyar albişirErebî»
yekê ber neşî we emir dawer
xuđawend cew dem nêda kerd we nûḧ
wat qapî dinyam pey to kerd meftûḧ
ce qaf ta we qaf bî be mułk to
zer’ û zêndegî ewladit mebo
ehil keştîm gişt fena da ce qar
ce kufir nê’met qewm şermesar
rasen xo min pey bê kesan kesim
sewgend we ’êzzet zat eqdesim
carê ter tofan řa benden we lêm
nenmanûn we qewm bendegan wêm
nûḧ sucdey êxlas bendegî berdiş
şukiraney nê’met we ca awerdiş
cew dima we şad dinyay dûn temam
bexşa we yafis çenî sam û ḧam
rubi’ meskûn gişt çûn xiredmendan
kerd we sê qisim û daş be ferzendan
sam çûnke erşed ewlad wêş bê
nûr muḧemmed mustefa pêş bê
şerîf qapî şay lem yezel bê
řesûl û řesûl zadey mursel bê
welî ’ehd nûḧ wala sêfat bê
nadrey nedîm řûy ser besat bê
êqlîm şam û cizîre û ’êraq
fars û xurasan ta nîmey afaq
nisfê beł fêşter, ce dinya temam
řûm û ’ereb gişt, kerem kerd we sam
zenc ta meẍrêb, hem ḧebeşe û hênd
bêlad bêladan, ta êqlîm sênd
yane gişt yekser, kerem kerd we ḧam
baqî eqalîm her çî mend temam
seqlab seranser, turkistan çîn
bexşa we yafis ta meşrêq zemîn
ce no xuđawend danay layenam
no ferzend pak, ’eta kerd we sam
eweł erfexşed «abu alanbyaErebî»
duwem keyomers «abu alpadşa»
«asud» û «bifin», «yurc», «dilawid»
«’ilîm» û «arim», «yur» saḧêb cûd
be «yafis» yazde û be «ḧam» bexşa no
cya bîn ce hem gişt giro giro
her yek we cayê teşrîf berdişan
her kam êqlîmê eḧya kerdişan
dîsan dinyay dûn tîp tîp û tûq tûq
me’mûr bî temam ce giroy mexlûq
sa nûḧ ’umir wêş pey řezay barî
serfiş kerd ne řay ta’et guzarî
xelas bî ce des qewm bed endêş
des kerd we tewbîx ewladan wêş
’umir şerîfiş we bê qîl û qał
yawa be no sed çenî penca sał
ta yek řo qabêz çenî cibre’îl
we ḧukim ferman şehnişay celîl
her dû we lay nûḧ teşrîf berdişan
ce emir xalq muxbêr kerdişan
persaşan ya nûḧ ce řozgaran
daxo çend sałen ’umirit wiyaran?
watiş qyas ken dinya seranser
qesrê şîrînen ya koşkê dû der
eweł we şadî cew der daxił bîm
axir we nakam cey der hem ber şîm
ce amam ta ḧał wadey lwamen
nezanam lezzet dinyay dûn kamen
be’d, azarê giran yawa pêş
sam kerd we nayb welî’ehd wêş
emir û menhîyat ewladiş temam
řesim řêsalet gişt bexşa we sam
ce daẍ dinya kêşa ah serd
erwaḧiş teḧwêł qebiz qabêz kerd
her sê ferzendan ’alî mêqdarş
şustişan qałb bizurgewarş
ce seray şerîf «bît alimqidisErebî»
kerdişan medfûn cew erz eqdes
cew dima xuđa tewfêq da pêşan
meşẍûł bîn we kesb ecdad wêşan
yafis be terîq seḧra nişînan
çenî ferzendan mesłeḧet bînan
sya çadran êxtira’ kerdin
řozgar temam xas we ser berdin
be’zê bîn eḧşam, be’zê dêkanî
be’zê we zar’, be’zê çûpanî
be’zê şaristan bîna nyaşan
dewłet û nê’met řû kerd we laşan
be’zê řa berdin we sin’et sazî
be’zê des kerdin we şeytan bazî