amdin kinîzha bih nizd şîrîn û şîrîn azhar diltingî xud nimudin
Li pirtûka:
Şîrîn û Xusrew
Berhema:
Xanayê Qubadî (1704-1778)
6 Xulek
230 Dîtin
nazk nemaman, newçe newhałan
řend řewêłan, bezim řwałan
dewrdan ne dewirş naz nizare
senceqdan ne dewr meh çun sitare
midran be edeb ne dîdar dîn
sucdey sûcûd dan ne dewr şîrîn
şîrîn be şîwen dyaş be yaran
esrîn řêzna çun seyl baran
be deng diłgîr cergey qełem kêş
çiřîş yaweran yekayek be pêş
aman be pabos berguzîdeşan
yekayek bosa des û dîdeşan
yekayek yaran be zarî temam
wem nyan ne dem gonay cemîn cam
watiş yawran mizandê çêşen
şor şîn min destûrê pêşen
yaran yaweran, tac kakołim
hamřaz řagew řefîq çołim
nazar û nazkêş yagey nazmen
meḧrem soz û hem gudazmen
dost diłpezêr yar û ẍemxiwarim
sebûrîy sefay seba û êwarim
tebîb derman, enîs derdim
ayney derûn cemîn zerdim
ser ḧîsab ser xefit û xawanim
qedîmî sałan banûy bawanim
newa bwaçan şîrîn weşşen
dimay keyxusrew ’eyş û noşşen
berg qełaxî kendenş ne wer
poşanş be ten kałay bo ’enber
şefaf şewher new zerûrşen
şadîy soz wisaz derd şûrşen
be soz sałan syasetgeren
axir perê min çopî çemeren
dimay keyxusrew namanûn be şad
bigêłûn ne dewr, ser nedewn we bad
şerit bo min ce dax şêros zînakar
bidewn cerg wêm be têẍ abdar
şaden xatirş binîşîn we hem
şerten şikofem newîno weçem
watiş yaweran xaren xeyałim
pey gerden azad biken ḧełałim
xeylê çenî min berdentan cefa
kêşantan pey min çend řenc û ’ena
henî meḧałen binîşîn we hem
dîdar şîrîn bwînin we çem
ha dîdarman gerdûn berd we ser
mer řoy qyamet ne deşt meḧşer
daxo dimay min esîr kê bin?
werdey derbeder, desgîr kê bin?
dił řêş kê bin be zarî û zigar?
kê ce derditan bibo xeberdar?
kê bo be umêd yagey řaztan?
kê bo bikêşo çun min naztan?
yaran, yaweran řoj îmanen
řoj řestaxêz cyayîmanen
beydê buzmê dû des ne gerden
ḧełałim keran, mişûn we merden
nyen zîndegîm dimay kemer lał
binmanûn ce yam dinyam bo betał
mibo binyerûn bo we şeda
wêm sernîgûn kem we giłkoşeda
ye zîb û zînet xet û xałmen
’ezim ’urûsîy kemer lałmen
zewq û şadîmen, xoş xeyałenan
îmşew mîhmanîy kemer lałenan
piştan bû çenîş bo we boşewe
bo binyew we xak giłkiwî noşewe
ba dimay xusrew nebûn payedar
bûn be ham nişîn şêroy zînakar
berşûn ce dułab dinyay bê berîn
çenî kes nenyewn ser we yek serîn
dimay keyxusrew ce soz nałîn
şîrîn çenî kes nebo ham balîn
ce lefiz şîrîn şineftin yaran
twasan ce taw tîp tetaran
kenîzan temam xuroşan ce laş
be yekbar keftin ne řûy xakpaş
yaran yawer cemîn camanş
yeka yek bosan des û damanş
ce hîcir xusrew daxan dûşan
dax dûd derd dîn banûşan
be şîn wişîwen pałyanewe
be şewq şîrîn lałyanewe
watin: ey banû dexîlen aman
řenc û řyazet mawer ne řaman
derir dûn meker be nakamman
meşêwne meqam ser’encamman
şadîman meker be zarî û zwîr
ême be naḧeq meder be esîr
sîlsîle û saman xusrew meşêwin
duşminan dûn dewran medêwin
terk tedarek tac û text meder
ême be zelîl naşnext meker
nemanîm zelîl ême bêkesan
bibîn be destigîr dest nakesan
to ême ce mułk ermen awerdî
ce zêd zamin aware kerd
derd dûd dax ce xusrew beter
taze meker zam toz bestey xeter
ême zedey zam dûdîy derd dax
berg syapoş qełaxî qełax
bazeman be êş nêş cergewe
bey soz siftey sya bergewe
be zarî û zigar watin çêş kerîm
dimay to dexîl welay kê berîm
kê bo be umêd yagey řazman
kê bo bikêşo çun to nazman
be soz esrîn, be dîdey nimnak
berg azyetîy beden kerdin çak
sya sewadî aware kerdin
be nêş naxûn sed pare kerdin
be aw esrîn eşk şîn û şor
awerdin be soz zaman nasor
kiławçey zeřřîn taqîy teła řêz
nyan ne yagey xak û xûn amêz
kerdin řestaxêz çun řoj meḧşer
be şîn û şîwen ce xusrew beter
herçend lałyan be soz esrîn
fa’îdeş nekerd pey ḧał şîrîn
desdan ne gerden, aman be hemda
kerdin zayełe û zarî be çemda
fuẍan û feryad bêdad bêḧed
zarî û şor û şîn ce ḧed kerdin řed
şîn û řestaxêz kerdişan betał
şîrîn ce xidmet kerdişan ḧełał
şîrîn wat yaran fa’îdeş nyen
teqdîr tedbîr muqedder byen
ce des dewran řeng řozgar
mibo binoşîm noşanoş xar
kesê ne sayey çerx çepî waz
ce dam û dûnş nyen sirfiraz
xusrew xemînen ce tengîy mezar
pey dîn şîrîn ha ne întizar
bişûn byawwun be xak giłkoş
bo binyewen be xak yaney qebir noş
byawwun welaş bwînûn řengiş
ser bidewn ne say seraçey sengiş
piştan bûn we bejin zûx zamanş
bose dem gonay cemîn camanş
henî ce şadî nyen qerarim
pey řagey lwan nyen medarim
êşew mîhanîy xem xeyałmen
ce new ’urûsîy kemer lałmen
nedarûn medar, dêren direngen
xusrew xemînen, xatirş tengen
ye dîn axir dinya û dînmen
ye şor şîwen axrînmen
fa’îdeş nyen yaran, yaweran
lwanim ferzen, merkeb baweran
henî dinyay dûn nyen menzûrim
be dîn dîdar xusrew zerûrim
mukemmel be zîn baweran be dew
serê bikêşûn be xak xusrew
bwînûn dîdar dîn dos wêm
ten bidewn be têẍ herçî meyo pêm
řwałan be řem yaweran be şîn
be taw û te’cîl merkeb kerdin zîn
be zîn zeřřîn tekełtûy teła
mîna û muresse’ xas piř cela
řîkab zeř nîşan daney dyarî
zîn poş zeřkeş řîşe mirwarî
pêkan ne «kelleş» muresse’ lucam
mîna û mirwarî temam sîm xam
kêşan kenîzan be şîn û esrîn
awerdin weber şehbaz şîrîn
şîrîn be şîwen xêza ḧeraman
seyl esrînş řêza ne daman
watiş be yaran hîmmet bibo yar
ḧełał ken wenem řenc řozgar
ce new hem bosa dîdey mestişan
bosan dest û pay awat westişan
şîrîn ne pêwar perdey berg wêş
kerdiş tedarek qesd qetił wêş
deşney têẍ têz nîhanî nîhan
horgirt çenî wêş perê qesd gyan
ce lay kenîzan berdiş bêguman
nezanan peneş exter encuman
cellad gyanş nya ne pêwar
pa da be řîkab, şîrîn bî swar