kiştin şîrîn xud ra dir sir qibir xisru
Li pirtûka:
Şîrîn û Xusrew
Berhema:
Xanayê Qubadî (1704-1778)
10 Xulek
253 Dîtin
fotey ḧîcabiş hewa da neser
hîmmet xwah kerd ne qesir û menzer
watiş: dihir dûn xuda nîgehdar
to biman çenî çerx řozgar
nefrînda be dûn dewran fanî
ce dax xusrew cam cîhanî
kes beser neberd can û cwanî
taser negêła be kameranî
er sed padşay cîhan gîrenî
eger pehlewan texiş tîrenî
’aqîbet barit çun bar bîden
dewranit fanî, axirt êden
xak adem xwar xûnî xîşim xûn
xusrew kerdî xwar, şîrîn sernîgûn
ye watiş şîrîn horêza ne ca
pada ne řîkab řahî bîneřa
tîp kenîzanda ne pişt ser
řagey kes nehat mergiş girt ne wer
pol bazî baz sazan diłkêş
çenî def û çeng awerd wist ne pêş
saz mûkeşan muẍnenî be soz
deng tepłî baz neẍmey ciger soz
ne pişt şîrîn saz serserî
newazan neẍmey çopî û çemerî
şîrîn fotey şerim hewa da ne ser
bê perdey ḧîcab řageş girt ne wer
be soz sazan nałey çeng û def
kêşaş ne mabeyn sef ara sef sef
ce berq beyzaş řewşen bêzna
nûr peř û bał xurşîd řêzna
ewřo qap qezay gerdûn girya waz
pey dîn dîdar dîdey sipî baz
fewc melayk amaş be seyran
firîştan ferş mendin be ḧeyran
însan bî řencûr, melan mendin řeq
melayk bî mat, melek wat «sidiqErebî»
herkes dîş dîdar şîrîn bew xałan
lwa ne camey mecnûn sałan
bî be canşîn qeys koy duceyl
deyrî bî dehrî ce hîcran leyl
kesê mend be pa, kesê sernîgûn
kesê ce hîcran tûna bî we tûn
yekê şî ce ḧał, yekê şî ce hoş
yekê merd ce dax, yekê bî medhoş
merdum ce dînş berliwan ce dîn
şêt û şeyda bîn ce şewq şîrîn
şîrîn be sazan soz çeng û def
guzer kerd, wiyerd ne mabeyn sef
ne mabeyn sef wiyara be dew
yawa ba gumez mezar xusrew
mwatin şîrîn dimay kemer lał
şewq û şadîşen ha ne xet û xał
fotey ḧîcabiş hewa dan ce ser
soz û sazşen mişo be şewher
yawa be gumez, merkeb da qerar
pya bî ce zîn, şîrîn bî midar
espiş da be dest kenîzan řend
watiş: bigêran merkebim we bend
wêş bewaweyla řwała be dew
yawa be giłkoy mezar xusrew
wêş sernîgûn kerd ne xak giłkoş
piştan be perwêz bo nya we boş
yek yek ce nałan mendey pes û pêş
ce new be naxûn kendiş ne cay wêş
ta tayê ce zułf mendey têẍ têz
be çeng naxûn horişkend ce pêz
toz bestey zaman gonay ẍerq xûn
horkendiş ce new be nêş naxûn
ałat ełwan berg řenga řeng
pare pare kerd be ełmas çeng
serş da be seng ne say giłkoşda
zarî bang berz berdiş be řûşda
xêza be şîwen nîşt ne serînş
yawa be gerdûn nałey girînş
esir hûnînş be taf û dew da
řêzaş be giłkoy xak xusrewda
watiş: kemer lał fîday nawit bam
bêdar ber ce xaw fîday xawit bam
kemer lał key ser hurder ce xaw
xaw seray seng be to nyen baw
bêdar ber xusrew çi wext xawen
dewran dinya bê to xirawen
horêze ce xaw, mer lêławenî
ye çêşen ne fîkir xefit û xawenî
ser horder ce xaw dił azar derd
bwîne şêroy şûmit çêşiş kerd
deng xoş xwanan biřîş ne eywan
nîkîsa destiş, barbud zwan
cam řêz şêwna, kîsra kerd xiraw
bad awer şikist, dest efşar ne aw
şewdêz kerdiş pey, guł gûnda têz
supa û serdaran awerdin gurêz
xwace serayan kenîzan řend
xase ẍułaman bendî kerd ne bend
taciş dan ne ser nîşten ne textit
daş be aweda sîlsîle û řextit
cehd û cextişen, şeyday şew û řo
ha ne qesd qîn pey namûs to
miboş bikêşo yekca pa ne pêş
diraz kerden des ce endazey wêş
ew toş be xencer ẍełtan hûn kerd
tacit be tałan, textit nîgûn kerd
tazî tewaran, gêłanî kemend
yede û beḧrîyan kemend pêt nemend
quşxanan derbest, quşçî bîn fîrar
mîhteran muflîs qetar û nehar
çaweşan ne bend, cařçîyan ne gîr
xanan bed dam, serdaran esîr
supat sergerdan, sułtanan xemîn
şahan ne şîwen, şehryar ne şîn
kursî nişînan sendelî ce zeř
xałî ce xanan tac tawis peř
meclîs meqamat mest cam mey
xałî ce şadî key keyan key
saqyan ser kom ce cam bade
pyałan peşêw, nîgûn futade
suraḧî sermest, qeřabe xeste
şîşe serayan şahî şikeste
bazî baz bêdeng, sazan sernîgûn
xoş xwanan xamoş ẍełtan çenî hûn
xirawen xapûr derwazey perwêz
deng bayequş meyo ne cam řêz
qapît qufił qesd qatił negîren
nakesan şîrîn peneş esîren
ser horder ce xaw çêşt xeyałen
pey to şadî û zewq şîrîn betałen
meger çêş mibo carê ce caran
nîga key ce dûr bwînî yaran?
xuroş xîşimit binmanyewe?
şîrîn ce załim bistanyewe?
fîdat bam xusrew ye gîr kênî?
gîrodey pabend zincîr kênî?
ye çi xawêwen toş kerden xeter
bêzar ce dîdar nazar û diłber?
ye çi xawêwen to pêş xemoşî
ce dad şîrîn mat û medhoşî?
bêdad ber xusrew fesił beharen
fesił fezay seyr, şewq gułzaren
şewnim be nim nim nemîr ẍuzaran
be wêney lale ce lalezaran
serzemîn sefay qeys qeharen
xełas ce sermay leyl û neharen
gułan guławan, guł û gułzaran
çemendan ne şax çetir çinaran
mat û melûlen, her řořo şanen
arezûy dîdar dîn toşanen
xusrew dimay to dinya bo berbad!
ne şêro mano ne şîrîn be şad!
dîdem fîday zam ciger çakit bam!
xaw xamoşî, yaney xakit bam!
xusrew, wêm be nezir xak giłkut bam!
ferhad, wêm fîday zam bê şot bam!
ferhadim, fîday seray sengit şam!
mekan û maway tar û tengit bam
fîday tîp û tewq şah û xanit bam!
serdarim, be nezir supa û sanit bam!
nezir û text kemer lałit bam!
fîday beydaxan zeřřîn bałit bam!
fîday tenteney fewc feřit bam!
wêm nezir serteł sîm û zeřit bam!
nezir şeca’et dilawerît bam!
fîday lał bexşîy bad awerît bam!
fîday san sef sed hezarit bam!
fîday tełay des des fişarit bam!
sergerd şapûr hem şewdêzit bam!
be nezir şîrîn şeker řêzit bam!
nezir sîlsîley tac û textit bam!
fîday zelîlîy zam sextit bam!
fîday bezim û řezim soz sazit bam!
nîkîsa û barbud xoş awazit bam!
nezir kenîzan eramendet bam!
tîp ẍułaman peřagendet bam!
fîday sef aray şehryarit bam!
san sîlsîley tar û marit bam!
nezir ẍełtanîy xak û xûnit bam!
sertewq zeřřîn sernîgûnit bam!
fîday banwan esîr berdet bam!
dîwan şahan betał kerdet bam!
xusrew xuroşan xîşim coş û ko
serdar serkeş serkeşanim řo!
lał poş û lał bexiş xas xeyałim řo!
newey keykawis, kemer lałim řo!
şah şêr şikar ẍezyanim řo!
salar serheng key keyanim řo!
diłdar û diłber dilawerim řo!
gencûr koy genc badawerim řo!
şehenşay şahan şehryarim řo!
desbaz desgîr des efşarim řo!
sułtan salar beḧir û beřim řo!
sebir serdaran kiław zeřim řo!
xwace ẍułaman duř ne goşim řo!
keyanî meclîs bade noşim řo!
baş başqey ’ezîzanim řo!
serdar saḧêb kenîzanim řo!
bêdadim gerdûn, keyqubadim řo!
şêr zeberdest hey ferham řo!
şîrîn bey destûr xusrew milawna
fuẍan û zarîş tewen mitawna
des berd horkêşa deşney têẍ têz
desteş meḧkem kerd ne qebir perwêz
nûkiş kerd weban, nêşiş winara
serkerd ne bała ser nêş xara
watiş: dehir dûn xuda nîgehdar
ha mişûn ce řeng řagey řozgar
ba řoj řewşen kerûn be zułmat
ser berûn ne say syahîy memat
serbinyewn ne say syay sengewe
tek dem be tekyey tar û tengewe
bełê dimay min gerdit bero bad
çerx nîlgûn nenîşî be şad!
dimay keyxusrew newey keyanî
nemanî be şad dewran fanî!
ye watiş şîrîn şeyday bê dirêẍ
ama cerg wêş bidero be têẍ
piř taf best we pa, xêza be hewa
qedrê ce sîney zemîn bî sîwa
biłind bî bewterz xêza be axêz
ama serender perê têẍ têz
sîne û cerg wêş be axêzeda
daş be nûk têẍ deşney têzeda
kizeş da ne cerg mewday mû şikaw
diřîş cerg û dił têẍ taze saw
nûk sermewday ser saw tazeş
mewdaş ber lwa ce muhrey mazeş
nûk nêş têz ce sîneş berşî
minmana berqey berq ateşî
gum bî ne cergiş deşne ta be mişt
kêşa zwaney zyadîş we pişt
ce qirçey xencer, law mewc hûn
şîrîn şî ce ḧał, kirya sernîgun
ce taw deşney jar alûdey jar
ce zebir û zorîy êş û nêş xar
zîřnaş be zar, şîrîn be wer berd
serkerd ne cergiş qetrey zûx zerd
tik tik zûx zam qetran qîrîn
coşaw serwaz kerd ne cerg şîrîn
xûnaw xusrew zûxaw sałan
kinyaş ne derûn çun law waran
xêza û xuroşa hûnş bê midar
ce zam deşney jar alûdey jar
hûnş xuroşa ne cerg pare
şanaş wêney mewc fiřey fware
ełwan bî bejinş ser ta we daman
ełweday ełwan ce zûx zaman
fwarey hûnş serkêşa ne ewc
ne dewr şîrîn mewcya be mewc
çun taf qełwez hałan ne dewda
ama be giłkoy xak xusrewda
şîrîn şeyda kirya sernîgûn
zincîrey zułfiş masya ce hûn
řijya hûn we berg şimşad bałaş
řengîn bî řext û ałat wałaş
peştan bî şîrîn we bejin ewda
be xak syay giłkiwî xusrewda
zîřna şîrîn, nała we bêkes
kefit ne hîlaket nezd nîm nefes
murẍiş ce sindûq qefes perwaza
ce sedir sîneş neẍmeş newaza
cwana û cem bî ne çartînîş
ama ser nya ne nûk bînîş
řoḧ řewanş řwała be řem
erwaş ser nya ne sewday sitem
kasey pyałan dîdeş piř ce hûn
bałay mujganş serkerd sernîgûn
bêdeng bî ce deng, ce nałişt naz
medhoş bî ce hoş, ce řêzan řaz
qabîz be qesdiş be te’cîl û tar
ne sedir sîneş çingiş da qerar
be çengał çeng qulapey ’ezab
çeng da ne cergiş çun qetrey gułab
be qesd qatîl qebiz řoḧiş kerd
sebit defterş be katib siperd
bełgiş ce derixt řêza ce řazan
bendiş bî cya, kinya çun xezan
farîẍ bî ce nêş dûrîy dax derd
laşey letîfiş bî we seng serd
sergum bî şîrîn ce zûx zaman
kêşan ca’îzey namş ce naman
ecel daş ne dem badey bê hoşî
ser berd ne xaney xaw xamoşî
bo nya ne boy gyanş ce new
piştan bî şîrîn be xak xusrew
nerd zebûnîş tayn bî ne tas
ce dîn dîdar şêro bî xelas
bî be dastan perê pîr û pend
nezim nêknamîş ta hezar û end
şerit şîrîn mend ta be qerin yam
şîrîn mend be şerit, şêro bî bed bednam