riftin şîrîn bih ḧimam û xud ra dir zahir arayş nimudin bih cihit şîrwî bidzat û dir batin xud ra be qitil risanîdin û şîru bî xibir az kar
Li pirtûka:
Şîrîn û Xusrew
Berhema:
Xanayê Qubadî (1704-1778)
5 Xulek
269 Dîtin
bişnew ce şîrîn xatir xeter řêş
ama ne serkar qesd qetił wêş
şîrîn be şîwen xêza bew xeram
çenî kenîzan lwa be ḧemam
berg sewadî syaş kerd ne wer
siłsiłe û serwên hewa da ceser
’uryan kerdiş ten zexmîn daxî
berg azyet sya qełaxî
bilûrî beden, kafûrî wên
ser berd ne ḧucrey ḧewz xezêne
gêsû kemendan, zułfan çîn çîn
pexiş kerd ne řûy aw zułfan muşkîn
çun bet û borçîn, teřlan awî
ser sewz û borçîn soney mirawî
çun burc beyzay bend êłaxan
ḧucrey ḧemamş kerd be çiraxan
tawnaş tewen terz taw tûr
şewqiş da ne taf çun beyzay bilûr
kerdiş şustuşoy kemend û kiłaf
be çeng çił çeng şaney sîm saf
awerdin be ca ferman wêşan
çend zeř û gewher bexşa da pêşan
be ab ’ereq gułan ’enber
ce muşk û mêxek ce pa ta we ser
ẍesłe û ẍesiłş dan be kîse małê
muhrey mişt û mał aw zułałê
pakîziş kerdin sertapa temam
małan be małişt wêney nuqrey xam
ḧemamçîy ḧucrey cûq camedar
xidmet guzarîş kerdin bew qerar
awerdin beca xidmet wêşan
şîrîn xeylê mał bexşa da pêşan
be seng sya pajne û dest û paş
be małişt małan xas xatir xwaş
’etir û ’ebîrat şendin pêşeda
be zułf û gêsûy xatir řêşeda
xêza xeraman ne toy enderûn
ama nîşt ne text ne ḧucrey bîrûn
nîşt be dił azar xatir xeter řêş
bînaş kerd bunyad arayş wêş
awerdin perêş esasey bergiş
terḧ tedarek qîsas mergiş
buxçey qumaşan yek yek kerdewe
be soz zarîy ah serdewe
hordaşt lîbasan řengîn řeng řeng
hem parçey zeřbaf xolasey fereng
poşaş be endam ḧerîr û wałaş
vutnî û qenawêz, qumaş tałaş
mûd mutebbeq, turmey teła baf
futatî xuten, sosenîy şefaf
guł gezî û guł bend kesarî ketan
kêş kîşmîrî, xasey serxetan
taftey teła baf, darayî dara
taqey tebedar, xarayî xara
zeřbaf zeřkeş zêbay zeř wereq
şał baf şahî, mûd mutebbeq
badłey bender dêbay eşed bo
zêbay zeř endûd, zeřtan zeř po
qeseb qełemkar, ḧerîr zeř keş
tertîf teła neqiş muneqqeş
pa bend zeřřîn, sertîp teła terz
kefiş guł ne dem, seferîy paşne berz
poşa be endam řeng ’ecawî
dêbay zerd û sûr beneqiş û awî
mêxekî muşkîn ce sebiz nîlî
dêz û darçînî, fîlî û mendîlî
pîsteyî û cewzî û maşî û narincî
kaşî û xaşxaşî, bor û birincî
lagîre û lerzan kerdiş serawêz
lûley řîşedar, daney lał dêz
’enberçe û ’enber kełan gułkeş
muhrey mirwarî yaqût lał bexiş
zeng goşwaran daney dyarî
paçeş ce zimřûd, řîşey mirwarî
taqîy teła řêz, tac zeř wereq
kiławçey zeřřîn, tac guł tebeq
tewq gerdenbend, teła ce çend qed
payeş eşrefî zerd zeberced
kerdiş serawêz be řûy sîneda
bew xet û xałan hezar wêneda
daney enguşter ne pencey şimşał
bazûbediş best, bazû piř xiřxał
cew dima saman serwên kerd temam
ama ne serkar celîy cemîn cam
małaş ne gona sifîd û surxaw
xettat da nexet mujey dił şikaw
mujan kerd be tîr xedeng xara
nêş nûk nexiş ce kîn dara
ebroş be sendeł syay sendeł saw
kerd be qews kêş key keyan daw
dîdey sêwengî keyl surme kerd
zułfanş peştan meftûn me kerd
futat xałat be edaze kerd
cela da be xał yek yek taze kerd
zincîrey zułfan keyl keyanda
kerdiş serawêz be řûy beyanda
saçax serwên sonhî dyarî
best be řenga řeng kêş kesarî
tewq gerden bend řîşey řyaḧî
ser da ne sîney saf suraḧî
wała ne beden bejin bilûrî
nimanaş kałay kan kafûrî
sêb ẍebẍeb çun xwansarî baxan
pey taq ebroş bî we çiraxan
dehen kerd be durc daney dyarî
mulḧeq be mercan mêx mirawrî
leb kerd be lalay ’eqîq ser zeř
zinc û zenexdan çu tełay eḧmer
gonaş betał kerd şem’ şew çirax
xoşter ce sêban xwansarî ce bax
pexiş lale řêz daney dił pesend
nimana qubbeş çun qendîl qend
dîdeş bêzna dîdey ẍezałan
şêxan kerd be şêx sen’anîy sałan
cemînş beyzay bilûr bêzna
şe’şe’ey şu’a’ xurşîd řêzna
sefay serapay qemer da qerar
şîrînîy şîrîn ewřo da dyar
pence û pa û des xîzabîy sêweng
be řeng ḧenay cewher kerdiş řeng
ce muşk û mêxek darûy muşk nab
şanaş be wêşda ’ebîr û gułab
ḧûr û mela’îk amaş be seyran
firîştan ferş mendin be ḧeyran
cînan û cennet řewneq řêznan
xasan cawîd wêşan bêznan
şîrîn bew destûr kerdiş gołbaran
bî be new ’urûs arastey şaran
herdem midya wêş be wêşeda
siftey ah cerg sozey řêşeda
ce dax xusrew newey keyanî
ce dewr dinya û wadey cwanî
dimay arayş soz û saz wêş
poł kenîzan tełeb kerd we pêş