riftin şîrîn bih kuh bîstun û dîdin firhad
Li pirtûka:
Şîrîn û Xusrew
Berhema:
Xanayê Qubadî (1704-1778)
4 Xulek
323 Dîtin
tûtîy xamey şox şekerxay dêrîn
bey tewr natiq bî pey řaz şîrîn
mubarek řoyê ce řozgaran
nîştebê şîrîn sad çwenî yaran
cam badey nab ne dilêşan bî
şêwey xusrewan qedîm pêşan bî
ce dest saqîy semen boy sade
peyapey peywest mwerdin bade
her yek mikerdin be xende çun guł
suxen serayî xaster ce bułbuł
ta muselsel bî zułf ew suxen
be koy bêstûn ferhad koken
axir ke şîrîn serkêş řendan
wat bew newhałan muşkîn kemendan
řezamen seḧer ey dinyay fertût
řexşan bo ce xor çun qurs yaqût
bişûn be tacîl be bî çend û çun
çun sitûn zeř we pay bîstûn
bikerûn seyran teř desîy ferhad
çon seng mitaşo be têşey ferhad
êdis wat ew řo ẍurûb teng
wiyara çenî yararin ham deng
çun bilûr subiḧ řexşan bî ce nûr
şîrîn şem şewq şahane destûr
poşay dêbay zeř bûm zeř zeř tar
pêka ne şewbend cuqey tawis tar
dwazde gêsûy ḧey ḧełqey bo naf
çenî řiştey sewz qozaxey kês baf
ce ferq qulley qetran ce serda
werda çun ejder be řûy kemerda
girtiş be destey zułf ’enber bo
ser text şîrîn şamemey lîmo
sox şox wêney řend sermest bezmî
pişt best be destimał dêbay xwařezmî
axir ke fermaş bała zeř sitûn
espê awerdin be ẍeyr ce guł gun
zîn ce tełay saf, ser dêbay zeř
sîne bend ce sîm, ce daney lał peř
ser kel nenîşan yaqût eḧmer
dukdukey mexfî ce ’eqid gewher
axir sehî seru saway sîm endam
semen turk sîmay semen banû sam
çenî çend ’îşwe û çend ẍemze û çend naz
be pabos wêş řîkab kerd mumtaz
swar bî be řexiş çerx tewr perwaz
şahane destûr daş ne tepłî baz
çun muşkîn wehar ce gułşen meḧşûn
řûş kerd ne pay text berz bêstûn
şineftim şîrîn bew nazenînî
bew nazk teb’î, bew gişt řengînî
xaster ce şahan nadîrey eyyam
řoy şikaru řezim řeşîd bî temam
«alqisihErebî» ew sewł newxêz sawa
we pay qulley qaf bêstûn yawa
ce ’ekis ḧusinş yeksan bî řexşan
ew seng çun daney lał bedexşan
xoşter ce şabał perîy xoş endaz
ciłew horkêşa nîga kerd be naz
dîş dest û têşey ferhadkoken
bewrê badurîş wêney tehemten
wextê mişanaş we têşey seng bo
miřêza řêzey seng çun daney duř
her car mişana qułingey folad
bêstûn ce zerb destiş mikerd dad
giřey ah germ dwî dozex nêşen
çenî pirşey berq qułinge û têşen
ne pay bêstûn koy demawend terz
minîşt ne řûy cerx bêstun berz
ḧeyran bî şîrîn yeksan bê hoş
ce naga espiş çun horgirt xuroş
ferhad nîga kerd dîş ew şox mest
lerza, sersam bî, têşen kefit ne dest
bê xud berd sucdey sim semendiş
bosa ẍaşyey mirwarî bendiş
şay şerbet řazan, zułf û xał şîrîn
qamet zeř sitûn, zułf bo ’ebîrîn
bew şiko û şewket dił pesendewe
çun ẍunçey beheşt leb be xendewe
wat: sed aferîn ferhad koken
neřêzo dest, şêr pîl efken
ta dîř zemane bazût nîgar bo
xesmet be şimşêr załim zamdar bo
êdiş wat derlad ew zułf bo ’enber
camê zeř nîgar ce şîr û şeker
her be des wêş çun saqîy newřes
noşa be ferhad, soza çun qeqnes
wextê ke noşa ferhad dêrîn
ew zeřřîn qedeḧ ce dest şîrîn
derlad ce zewqiş herçî bî małîş
berşî ce derûn siftey zuxałîş
axir ke ew şox deng derman derd
îradey teḧrîr murace’et kerd
ce qeza q qudret êzed be řengê
espiş seqet bî be parçe sengê
şîrîn şem bêz nadîrey zeman
ama çun daney mirwarî ẍełtan
ẍełtan bî ne xak ferhad dił řêş
be gerden horgirt espiş çenî wêş
yawanş bir qesir be dewan dew
şayed nezano bey qezîye xusrew
nişanaş dîsan we text şahî
bisa xakpaş, çoge bî řahî
hem wêş yawana ew neheng aheng
pey kendey ew koy piř xar û piř seng