riftin xisru bih mida’in û bir sirîr tixt nişsitin û xibir riftin şîrîn û şinîdin aw
Li pirtûka:
Şîrîn û Xusrew
Berhema:
Xanayê Qubadî (1704-1778)
2 Xulek
592 Dîtin
bey tewr kerd înşay dił pesendîde
be mîzan ’eqił suxen sencîde
çun hurimz be ḧukim zat îlahî
me’zûl bî ce text feřbext şahî
şî be «daralmilkErebî» xusrew nêk bext
mumtaz bî be tac padşahî û text
herçend pey şîrîn şehenşay lał poş
derûnş çun dîg buryan mida coş
emma ce edeb ew şay cewan bext
’eyb bî terk tac padşahî û text
werne pey şîrîn ce ’enber dara
subiḧ û şam weneş betał muyara
axir ke xusrew cem qedir cem kêş
taze kerd destûr newşîrwan pêş
wîlayet be ’edił temam me’mûr kerd
ce mezłûman zułim załman dûr kerd
wextî ce řay ’edił řewyey serwerî
xełas bî ce şuẍił řayet perwerî
xaster ce şahan cem cay cem şiko
şirû’ kerd be ’eyş be ’uşret ce no
minoşa şerab ce şam ta şebgîr
be řû ta be şam her mikerd nexçîr
bełê pey şîrîn ew şay cem nigîn
ce xełwetîda mikerd zarî û şîn
yek řo ce şexsê zułfan ’enberîn
persa be zerûr eḧwał şîrîn
’erz kerd ne pay text ew dara destûr
ye çendê wexten şineftim şapûr
ew řaz řêzey qend qamet zeř sitûn
nîşana be pişt semend gułgûn
new qesir cam řêz be dew berkerdiş
bełê nezanam ta we ko berdiş
xusrew cey neyreng çerx piř gezend
ḧeyran bî temam, xeylê ’eceb mend