min ferîwxurdey çêştey caran bîm

Li pirtûka:
Dîwanî Seyd Yaqoy Mayîdeşt
Berhema:
Seyd Yaqoy Mayîdeşt (1808-1881)
 4 Xulek  596 Dîtin
hoşim medhoşen ...
hanay hamseran hoşim medhoşen
kûrey derûnim wey tewr we coşen
kûrey ḧedadan welaş xamoşen
weled ẍezalî zułfan eşed bû
je nesił turkan tundixû melek xû
sabiq weled bî neyaway nîmřes
şemîmey şîrş mama je nefes
naşîy nabalẍ bêxeber je ’eşq
ders ne medrese ’eşq nekerde meşq
hêman korpey toknerim xam newî
je xamî û nermî hêman dam newî
ebroş we keman kyanî newî
tuřeş me’lûm bî, kemanî newî
dîdeş sya bî, xumarî newî
şehbaz bî hêmay şikarî newî
lêwanş we lal, bedexşan newî
duř têy me’lûm bî, direxşan newî
gonaş řeng ’işq pêş newşte bî
çûn sêf xansar xas ne řişte bî
baẍçeş bî, mîwe kem řeng û bo bî
çûn fesił xezan bê abřû bî
min meçyam welaş seyriş mekerdim
gyan neyrbała weceyriş mekerdim
ga ne doşim bî, gaga ne aẍûş
her satê sedcar bûse medam řûş
ne qedeqen kerd, ne musteḧfiz bî
ne tełayedar pey řefi’ diz bî
îsa bo sen’et karsaz karan
nosweyl çitewr meřjo daran
herwey deme da nûr pêş aẍşite
surxîy řeng dił derûnan çeşte
ne pa ta we ser nûr peyda weşte
sertapay bałaş îlahî řeşte
korpe, peřtukey kezayî xamş
pexiş bîyen weban cemîn camş
we serda xem, xem bîyen we sed çîn
her çînê nelay kerden we peřçîn
çînîy ’etir’asa, çînîy ’enberî
çînîy qeyçî paç, çînîy çenberî
çînî çûn seḧab syay deycûrî
ca kerden we fewq sêf seyfûrdî
çînî wêney mar meẍiz merdan noş
musteqił kerden çûn zehak we doş
çînî we ney da, çînî we bey da
her çînê çen kes westen we wey da
keman xanekî, ebro kezayîş
nepay çetir çîn ta berzayîş
bîyen we dû taq, dû mîḧrab besten
pey emir teqdîr zahd şikesten
çûn kemanêwen ce řostem menen
tîrş řîşey cerg eşkibus řenen
ne çûn dîdekey bê bade mestiş
mexmûr we sewday badey elestiş
bîyen we dû baz şeyday şox û şeng
hezar murẍ dił awerden we çeng
gayî nigayê kê we nazewe
bend bend řîşey cerg dê we gazewe
ne çûn gonakey şewq şem bîmş
sîmay sîm asay saxtey qedîmş
zerdîy řeng ’işq nûr peyda weşte
surxîy řeng dił derûnan çeşte
çûn baẍçe, beheşt bîyen nimûne
mîwe we guł, dar wew hezar gûne
lu bîyen, lulu we lal kanî
duř bîyen we duř deryay ’umanî
winewşe û badam, berza, sunbuł
’ud û yasemen, nergis, zemeq guł
guł surx û badam, ’inab û piste
nar û naringî, řeste û neřeste
sewł saye da kac we neyşeker
’ud û yasemen, şimşad û ’er’er
dû şaxey bilor de şaxe geşten
heryek mercanê we serş řeşten
baẍçeş weytewre îlahî řeşte
’eynîyen mwaçî baẍçey beheşte
dû turk bedxû tîrkeman û pêł
baẍbanş ha ne gişt gêł
her řehguzerê keç nîzareş kê
xedeng turkan parepareş kê
ne ke bwaçim şutur dîm, nedîm
keftim wetemay gustaxîy qedîm
des dirêj kerdim pey şaxey bilor
bełkem mercanê bawerim we zor
her ewsa zanam kemandaranş
weserda sipay zengî maranş
çenî dû ’eqreb êł carî kerden
heryek weye la hicûm awerden
şemaran û gaz, şehbazan û çeng
’eqreban û nêş, turkan û xedeng
her heşt pey qełem, heşt bena hêşten
sertapam wey xûn, řîşey dił řeşten
wat ey sey yaqoy eblehterî
lêwey xał xam, le gyan bêwerî
ye çi xeyałê we dił kerdenî
ełbet to we gyan wêt wiyerdenî
we tîr turkan zehrałû werde
bîm we merdey dewird qyanûs merde
hanay hamseran emanet ferzen
we xak patan îstid’am ’erzen
er we cwanî yanan geştenî
şukirê wew leb tifłan çeştenî
her wext ew tifłe we bilûẍ yawa
bałaş bî we tûł cenetumewa
ełbet ew çeştey nawerîn we yad
sey yaqoNasnava edebî asa ser medeyn we bad
min ferîwxurdey çeştey caran bîm
kuştey zehir şest zengî maran bîm