gaga şoney çîn řû ne maçînen
Li pirtûka:
Dîwanî Seyd Yaqoy Mayîdeşt
Berhema:
Seyd Yaqoy Mayîdeşt (1808-1881)
2 Xulek
752 Dîtin
xawêran xałit ...
xew senden ce xêł xawêran xałit
xerman daxman xanan xeyałit
cela da cemîn canan cemałit
zułf zahdan zinar pey besten
mujet meyl ne ’eyn ’abid şikesten
dewa da derman derûnan dengit
řewş da řoşin řozgar řengit
řeftar řewneq řubi’ meskûnda
ceyran ḧeyran min şî we hamûnda
qametit qezay qedrî qeza kerd
yaney derûnyan ẍemze ẍeza kerd
winewşey sîcdey xałit ferz kerden
cew bone mudam keç kerden gerden
mendey lêwtan ’eqîq eḧmer
řiştey bendegît besten ne kemer
ẍerez herkesê ne sewday çêwen
nîm xar xałen, nîm lêwey lêwen
nîstîy dînit we çem medaro
dîdem dîn to we dîn meşmaro
sîmar sefabexiş sefḧey gułanen
dînit beyt tewaf ke’bey diłanen
henî nekêşan ḧacyan cefa
ten nedan we cor řay merwe û sefa
beyan we tewaf dewr yaney to
ser sawan we sidiq ne asaney to
bełê kifir zułf dîn kerden bêdîn
saman dan sûret senemxaney çîn
beyzey kifir zułf dînit pêwaran
cew bone mudam leyl û neharen
sahir cewsawe ředay řebanî
poşan we adab dîn nesranî
ga goş we aheng, gułbang naqûs
ga sîcdey senem we dîn mecûs
ga sakin ne pay zułf peřçînen
gaga şoney çîn řû ne maçînen
meger bay şemał xelîl asay dewr
şikist da we bext butan we yek tewr
ta ew kifir zułf ne dîn pêwar bo
perê dîndaran dîn aşkar bo
werne bînayîm hey berguzîde
ne dîn memano, ne dił, ne dîde
nîstîy sedcar berkerdey řêt bo
ta zeřey derman derd min pêt bo