ce gyan sêr werdey ce ten herasan
From the Book:
Dîwanî Mewlewî
By:
Mawlawi Tawagozi (1806-1882)
2 minutes
1292 views
ce gyan sêr werdey, ce ten herasan
xałoy xemyay xem xałî xałxasan
namem çun yawa mulaḧezet kerd
bişo we pabos ’erizker ce řûy derd
waçe hey sed car me’dûmîPen name tufeyl
persabêt ce řûy germîy kûrey meyl
ko ce dûrîy min çi tewren ḧałş
kê bermekero xem ne xeyałş
çun ewê ce dîn çun toyê dûr bo
çem lêław, dił teng, ten siftey tûr bo
her sat we new’ê derdiş xeter bo
ḧałş çi tewren xakiş we ser bo
hamferd nałey dił, seyrange sitem
hamderd dûy derûn, xem berker koy xem
to xasen newtûł serwî serawan
xem midey we bad şinoy serkawan
ga çun boy nesîm we řûy şetawda
ga çun guł nepay çořey wefrawda
seyrî lerzey nerim sewzey ser berzan
sefay gułałan sed terzan lerzan
sub ne ser milan seyadan hamdem
şirîxey «mardim» kiłafey kełřem
nek çun ew pabend qełay şarî derd
cey wehar çun wełg payîzan řeng zerd
ax ne cehd û cext, dax zametî sext
bergî matem řext, nařesayî bext
kizey xem çun mû xem peneş werden
dûrît xo yekcar temamş kerden
wextî coşî derd kizey nałey serd
gum bo ne gêcaw gerdelûlî derd
ew xendey bêwext meyoş we demda
megêło maço new gêc û temda
er her ew bexten, her ew tałemen
dîdem dîdenît ełław ałemen