tu takey ne fikir sewday xamenî?
From the Book:
Dîwanî Seyd Yaqoy Mayîdeşt
By:
Seyd Yaqo Mayidasht (1808-1881)
3 minutes
2828 views
diłe damenî ...
hey dił gîrwerdey ḧełqey damenî
her kam mewînî, her nakamenî
her kar mekerî, her bednamenî
min her dewa kem, to her zamenî
tu takey ne fikir sewday xamenî?
hergiz xyałit satê cem nîyen
pay ẍuse û xyał lelat kem nîyen
çu dinya dest we yekdem nîyen
suraḧît ne sewt zîr û bem nîyen
her kar mekerî, her bednamenî
tu takey ne fikir sewday xamenî?
ga perwaney dewr şem cemałanî
ga hemřaz řaz kemer lałanî
gehê sikûtî gehê nałanî
ga çun ewdałan wêł małanî
min her dewa kem, to her zamenî
tu takey ne fikir sewday xamenî?
şîrîn mewînî ḧesretbarîten
tełxî mewînî şîn û zarîten
zişt û zîbayî bîqerarîten
pes tu çe derman derd karîten?
min her dewa kem, to her zamenî
tu takey ne fikir sewday xamenî?
ey dił pey cîfey ḧesret mewazî
cîfe peyda key, pey çêş mebazî
çun her sa’etê we yek mecazî
dinya pît byen nimewî řazî
her kar mekerî, her bednamenî
tu takey ne fikir sewday xamenî?
diłe let let bay çu nîl serxum
wes temenna ker we yaney merdum
herçî hawaran we řat awerdim
çenî gunahan sałan ser kerdim
ce řasî weḧşî, pey bed řamenî
tu ta key ne fikir sewday xamenî?
ah le xyałan mewyero ne dił
çu nûfił nûşam zehir hełahił
çen tey mekerî řagey bî ḧasił?
ne xasan şer’ ta key mekey sił?
hewa xway lezet çen bê tamenî!
tu ta key ne fikir sewday xamenî?
diłe kut kut bay, çen xyał pêten?
dîde hey kor bay kul gunay wêten
toşey bednamî, řay nehat řêten
mer nimezanî say ełḧed cêten?
bûm bed ’emeł textebamenî
tu ta key ne fikir sewday xamenî?
er to nekerî seyr zułf û xał
dił wew sipurdey çu mekey xyał
wirk nekey perê lîmo çun minał
er řoj bû we sî, hezar bû we sał
wêney ’arfan dûr we kamenî
tu ta key ne fikir sewday xamenî?
hey diłe er genc zemaney fanî
text siłeyman tac kyanî
meḧbûb çu şîrîn ziłeyxay sanî
perêt bawerûn pey şadmanî
axir ’aqbet bê encamenî
tu takey ne fikir sewday xamenî?
er fikirit řaḧet mał û ’eyałen
řaḧet pey ewlad adem meḧałen
herkes bwaço řay dił betałen
waçan sey yaqoPen name ebłeh xeyałen
her kam mewînî her nakamenî
tu takey ne fikir sewday xamenî?