aga nît je soz derd diłdarî

From the Book:
Dîwanî Seyd Yaqoy Mayîdeşt
By:
Seyd Yaqo Mayidasht (1808-1881)
 4 minutes  633 views
zahd ḧeramen
zahd zîndigî we to ḧeramen
ne şořit we ser, ne pat we damen
ne hergiz meciłs ’eyşit meqamen
merd mu’emem ředa we doşî
teqwa û ta’et kar peşmînepoşî
meçit nişînî dûr le basanî
bêxewer je nêş muje xasanî
temaşay ebroy xem nekerdenî
je xem û qamet çem nekerdenî
temaşay dîdey bazit nekerden
dîdey baz naz gazit ne gerden
seyrnekerdenî gunay gułnarî
aga nît je soz derd diłdarî
je řay derd ’işq gumřahît nîyen
suraḧî we des suraḧîyet nîyen
emnîyet nîyen we tareşewe
nazar û aheng qetareşewe
silêman dûsoz kemançeşewe
jêrş mewero dił we ẍeşewe
pencey seymame tirîketemûr
neẍmeş dił mekê we laney zemûr
nałey mutrîban nekerdenî goş
mirdey yek řoje bikey feramoş
perêzad bew sewt, cew lebanewe
nergis wew bałay minałanewe
fatme û temir nałey hey hełła
xał dewr naf, nermîy pencey pa
xanim mehîn bew qetarewe
’îsmet bew aheng kwenarewe(nar hey narewe)
xusûs çeqwaney dest řezayî
ne řeqis farsî û çopîy kizayî
hergiz nenîşî zahd lelaşan
nama ne goşt deng melaşan
amnet dîyen wew naz şewe
ẍunçe wew yexey nîm baz şewe
kizey kemançe neşneftî we goş
nîkî û bedî bikey feramoş
weqten bwînî ahûberewe
mexêzot we to yek xeyat peřewe
eger binîşî û bişnewî we goş
ḧeqperistîy wêt mekey feramoş
siday nazaran çû ḧełqe ha goş
we naz mwaçan bisane û binoş
badey cemşêrî nekerdenî noş
xusrwî sameẍiz kelet bidey coş
er to wêney min ey gişt esasan
temaşa kerdî newîyt herasan
le ew bezmigahe herasan newîyt
sersucûd birdey xałxasan newîyt
ewsa mezanim ḧeqperistenî
le ḧeqperistan baładestenî
herçend to şořit le min bêşteren
sewday ’işq to wêney nêşteren
to bêşter xeyał sewm û selaten
webê taqetî meçit mawaten
lew boney meçit mawa û małten
xeyał řay ḧeq zułłicelalten
meçit kerdenî we yataq xane
zikir kirdigar bîyen behane
sewgendim we taq ḧîcrey diłtengit
we pêç destar xałê je řengit
řay řewa wa necîrgerdenî we pêş
zahd to gurgî hay ne ciłd mêş
mer min wêney to wêm pinhan kerden
meçtim mayey aw û nan kerden
dîdem bepê kewt we dîdey xasan
nigaşan bikem bum herasan
herkê wim je dîyen dîdey yaranim
minîş je cumley ta’etkaranim
ḧeqperistîy min je to ewseren
min werje to cam ḧewz kewseren
ême û to weyek mekeym melamet
we’dey herdûman řoj qyamet
herdû metaman megrîm we des
nîkî û bedî mebo muşexes
herkes le dił daşt taqet kar nîyen
taqetnedarîş ta’et kar nîyen
yekzeře taqet sebûrîş nîyen
taqet hîcran mehcûrîş nîyen
to we tesbîḧ zikir zułłicelalewe
min wey tuřey zułf û dane û xałewe
to we ’emame û birdibarî
min we dest cam badey gułnarî
to we qed qamet zikir nemazan
min we qed qamet kemendendazan
to hayt we piley mîḧrab û minber
min we piley çîn zułfan ’enber
to taq mîḧrab bena perdaxte
min taq ebroy ḧeq je mû saxte
megrîm we des herdû metaman
muşexes mebo feził û gunaman
îmřo we řay to ders îmanen
ferda mezanî ḧeq we kêmanen
ewsa xełqułła newdim (newedim) şahden
ḧeq we sey yaqo ya we zahden