afret û cwanî

From the Book:
Beheşt û Yadgar
By:
Goran (1904-1962)
 1 minutes  4456 views
be asmanewe estêrem dîwe
le baẍçey behar gułim çinîwe
şewnimî dirext le řûm pijawe
le zerdey zor kel serincim dawe
pelkezêřîney paş baranî zor
çemawetewe beramber be xor
hetawî newroz, mangî codrew
zor hatûn û çûn be řoj û be şew
xuřey qełbezî kefzîwînî çem
le hezar çeşne pirşingî naw tem
mîwey geyştûy zerd û sûrî bax
cirîwe û cûkey daristanî şax
le gerûy şimşał, le telî keman
gelê hełsawe awazey cwan cwan
emane hemû cwanin, şîrînin
roşnikerewey şeqamî jînin!
bełam tebî’et hergîzawhergîz
bê řûnakîye bê bizey azîz!
bê awazeye denge nermekey
ba neyda le gwêm, têr nełêm oxey
kam estêrey geş, kam gułî kêwî
ałe wek kułmî? goy memkî? lêwî?
kam řeşî ega be řeşîy çawî?
birjangî? biroy? egrîcey xawî?
kam berzî cwane wek berzîy bałay?
kam tîşk egate tîşkî nîwnîgay?
kam tase, kam meyl, kam çawenwařî
telîsmawîye wek hîy diłdarî?