watey pexşan
ax! xozge fen ewende serkewtaye ke be mînatuz wêneyekî biçkoley tom le ser sîney xom bikêşaye û bibwaye be nexşî ser dîdem, ewsa dîde, kilî koy tûr... taqe tûrêkî nedehêna le lam.
xozge wek řadyo çon deng řa’ekêşê û deng edatewe, peřey gwêçkeş cazbeyekî way bibwaye ke dengî tom hemîşe le gwêda bwaye. ewsa emkird be ahengî řoḧim... ewsa dengî dawid û zebûrim be efsane ezanî...
xozge ḧilul û tenasux řast ebû, řoḧim eçuwe qałbî pepûleyekewe û hemîşe be dewrî serta egeřa.
xozge teyareyekim ebû, xoşim emzanî lêyxořim, swarî teyarem ekirdît û embirdîte ser kêwî qaf, ke ewsaye be tenha çûbûm, bebê to ew kiçe gurcye peryanem lela hîç bû, emustim bo řa’ehêştin û heřeşem lê ekirdin û emut: řamewestin... eçmewe, efsertan bo ehênim, ewanîşim ekird be karekerit.
xozge şa’îr bûmaye, ew şewî mangeşewî behare ke le nîweşewa çûbûyte estêłekey karêzî «ḧisênî ’ezîz coła» û lewê danîştibûyn, emřiwanîye to... şewqî mangeşew dabûye řuxsarit, şewqî řûy toş dabûye awî estêłeke. aw le řûy toda elerzî, estêre le estêłda elerzî, gyan le endamî mina elerzî... hewa elerzî, gya be hewa elerzî, le lay min hemû cîhan elerzî.
ca eger şa’îr bûmaye, be şî’rî to, lerzem exsite ’alemî şî’rewe, xozge ewkate xoşt lew aweda be çawî min xotit ebînî û diłit elerzî.
xozge wek ’eşqî min kon nabê û takû pîrtir ebim ew ’eşqe tazetre, xozge cwanî û şîrînî toş hetakû min mawim herwa bimaye...
bełam ax û dax!!
min le xakim û to le êsk, em êske sûket zû eřzê. lêreda wa be çend şî’rêk ke le konda bo newciwanêkim witbû wa bew boneyewe bo carêkî tir biławî ekemewe: