kurdî petî
From the Book:
Dîwanî Pîremêrd
By:
Piramerd (1867-1950)
2 minutes
2083 views
emsałîş dîsan wa geyme behar
sewzey mêrẍuzar, sozey mêrẍuzar
dugmey ser sîney beyan tiraza
beyan be gułî sipî û sûr řaza
hewrî beharî kirdî be heła
gulałe xeymey ałî xoy heła
berx û karjoley behar be qetar
hełpeřkêyane be beste û qetar
ke bay darawis eşnêtewe
pyaw xoy tê’ega û ebûjêtewe
ew bayey xakî zîndû kirdewe
pîrîy le bîrî pîran birdewe
be demaẍ xoyda le demaẍî min
ax bê demaẍe gułebaẍî min
be dest pîryewe kokekokme
xwazbênî befir û hełekokme
sa toxwa kuřgel êwe û xway xotan
seyr ken lebatîm ta delwê botan
ke «jîn» û behar herdû bayek bê
cwanî û newciwanî herdû ba yek bê
jîn ew jîneye beyanî behar
le goşey awê û yarêkî diłdar
dû dił yek bo yek awatexwaz bê
nek be nengewîst nyaz û naz bê
diłyan wek awî beyanyan řûn bê
be neş’ey sewday yarî gułgûn bê
tîşkî řoj bida lew awe cwane
şewq bidate ser kułim û biřwane
be zerdexene ser gonay çał bê
be boy henase hełgiřê û ał bê
dił serasîmey şêwey nazî bê
gwêy ḧełqe le gwêy şîrîn řazî bê
gyan badey ẍemzey çawî binoşê
dest bêpirs sêwî sîney bipoşê
ew sîne safe şewq bidate aw
aw bête lerze şerim hełsê le naw
sermestî sewda û serleser řan bê
egrîce leser řû perîşan bê
ew şilkey řane û zułfe sed terze
dił wek bîy naw aw bênête lerze
dem bestey tamî dû lêwî ał bê
demaẍ serxoşî dû lîmoy kał bê
enca be tikay nîga û be nyaz
řazî dił bête ser giruşim û naz
bełam ’eşqî pak ta ser emênê
wicûdîş nebê řoḧit ejênê
ewî natwanê ke xoy řagrê
xołemêş eba le cêy agirê