ancimin saxtin wizîr dir cwab aylçî
From the Book:
Komele Şîrî Feqê Qadirî Hemewend
By:
Faqe ghader hamawand (1830-1890)
4 minutes
741 views
saza encûmen pey defi’ îşkal
ewsa ce êlçî wezîr kerd su’al
ama be cewab merd ḧîlebaz
eda kerd senay herdû ser’efraz
wat êden meram wezîr ewla
teskîn do ḧerbe ne sefk dîma
êden wezîfey me’mûr sadiq
ce umûr kar ḧîkmet bo ḧazîq
eger nîfaq bo ce beyn dewłet
be tełef meşo îqlîm û mîllet
hem xezney dewłet mekêşo zerer
hem mezir’ey mułk mebo musexxer
hem nesîmey mewt ne sefḧey cîhan
xamoş meko şem’ cengîy cewanan
hem herkes ce mułk mebo herasan
mulewwes mebo umûr cîhan
ême çun erbab mesned û cahîm
wikelay dewłet umûr şahîm
er mułk sułtan beyo be tenzîm
teḧsînen mûcîb wizera û nedîm
eger xecił bî ne mułk her sułtan
mewanan nefrîn be muqeřřeban
er cey mesalîḧ be hem deym ulfet
îttîḧad mebo ce beyn dułet
êd xasen pey ceng nekerîm îlḧaḧ
eda keym şirût erkan îsłaḧ
sułḧ hem be yek new’ mebo payedar
ce beyn herdû êlçî deym qerar
sułtan ême daro sê îqlîm
her îqlîm daro umûr muhîm
pey her sê îqlîm sê merd debîr
rewan ken heryek be wecih sefîr
hem ême bewtewr dû merd fehîm
mekerîm řewan pey herdû îqlîm
hem ce terefeyn dû dana wezîr
te’îyn bo be řesim sefîr kebîr
ce beyn wêşan herçî dan qerar
me’zûn ban herdû ce umûr kar
hem be wasîtey sefîran kar
şahan ce her mułk megêro exbar
ce her ḧadîsey cewab û su’al
be se’î sefîr ḧel mebo îşkal
êden ce wezîr teḧrîr û teqrîr
herçî hen cewab mekeran te’xîr
serdar mecaz, wezîr efkar
herdû muttefîq aman be guftar
watin be êlçî ey merd piřfam
leḧzê ne çadir serdar be aram
binîşe newca be îstîraḧet
ta mekerîm wezin keyl selaḧet
horêza êlçî we bê çûn û çen
xêza giftugo beyn encumen
herkesê pey ře’î wêş mekerd aheng
be’zê ne sułḧ bîn, be’zêşan ne ceng
be axir serdar ce deryay efkar
berawerd lu’lûy teqrîr guftar
watiş her êden sewab umûr
betał keym nedił fîtney şeř û şûr
mudde’î weytewr bî zelîl û xar
miruwet xasen pey merd huşyar
ew kerd feramoş hetik elxennas
tarac xeyme û xezêney esas
xusûs ew herçî kerdenş te’rîf
şe’nen pey ême teqlîd teklîf
hêman ew pey sułḧ toş kerden de’wet
to pey çêş nekey çenîş mesłeḧet?!
herçende wezîr wêş bedsiruşten
emma ce ḧeqqen herçî nwîşten
ḧerekey êlçî hem be usûlen
teqrîrş pesend ehil ’uqûlen
ce sałêk řah weytewr exbaren
mu’arezey nefis sext dîşwaren
pey asûdegî beyn dewłeteyn
enfe’ ’ammen sefîr ce mabeyn
hem be wasîtey sefîr ne cîhat
dewłet mekero kesb me’lûmat
ḧedîsen ce leb nebîyî ebrar:
le’net berankes fîtne ko bêdar
ḧuzzar meclîs be ’îziz û temkîn
kerdişan be ře’î serdar aferîn
watiş be wezîr çêşen tedbîrit?
ney mecme’ey fîkir nîyen teqrîrit?
wezîr wat: ře’îm emir sułtanen
werne sułḧ û ceng ce lam yeksanen!
watiş be wezîr serdar mecaz
be min îqna’en şah serferaz
wezîr da cewab ’îşq mecazî
min hem mesrûrim er şa key řazî
be şertê serdar îqna’ kero şa
qerar dan pey sułḧ zumrey umera