pêkenînêk.. le baweşî giryana

çawêkî tîj... le jêr çawêlkey berdesêł
bîr be nînok hełdekenê.
be qandirmey qełatî kurd hełdegeřê û...
bo dahatûy çawî xwênîn, pêdekenê.
le řaportî areq řêjêka nûsrabû:
herçî biłêm temî hewa dey qostewe
terazûy şew... bedwamewe
xoy dekêşê.
bildozerî seretay sûr
deyan qortî dête pêşê.
herçî biłêm, wek bulbulê
dexrête naw qefesêkî xemî bêdeng
boye hêşta..
mistekołey... hestî řencî tiruskey şeng
le kałanî giřî xora hełnakêşim
le řaportî areq řêjêka nûsrabû:
herçî biłêm:
le mizgewta... le dîwexanî giryana
kotrêke... hełgirsênî giřî... şiřî
be bîr hatûy... ehrîmenî lansî xewe
nałêm, (nałêm)!! ta be janî xom deteqim
zamî bêdeng...
swaxî jûrî denûkî ceng.
witî: ey swarî amade... pêşman kewe
firyay şoxî... ew gyan bexwênane kewe
*
bîr hełkenêkî zor tînû...
le qûłayî naxî birsî
dił bizwênî karêzêke
baxçekanî sewłî derya... řiqî gułekanî wişke
korpey řegî kêwî awat...
her tamezroy amêzêke... amêzêke.
nan birsîye... çunke le ser xwanî řencî hejar dûre
aw tînuwe... çunke awî zêrab... (awe).!!
xem diłxoşe... kirasî bêdengî sûre
hełmî mandû be’awate...
le cêgey şew ałay sibeyne hełwasê
le ’erdî řenc genmî berhem bidurtewe
be awate... diłdarekanî areqey dił binasê
hełmî mandû
bêbarane... demî dasî bê berheme
zewîyekanî, baweřî gel
nayanewê,. şîn bêtewe, diřkî çîlkey em siteme
kamêrakey çawî mandû...
carêkî tir wa be «tîşk» sîngî hemuwan depşikinê
carêkî tir... wênekanman...
le geromey awřî dûr deşwatewe
weku derya...
awî coge û řûbarekan... dexwatewe