riftin miluḧ pidir qîs bixiwastigarî lîl
From the Book:
Leyla û Mecnûn
By:
Khana Qubadi (1704-1778)
4 minutes
915 views
«şîx alqibîlhArabic» banûy banwan
çend xatûn xas ce pîr û cwan
bizurgan qewm êl ’amîrî
seran sipay cergey amîrî
be sed tedarek hedaya û îxłas
dirhem û dînar, genc bê qyas
sed uştûr temam çenî sareban
berden we bargay sedir ’areban
mehdî şah nebî, welê xanê bî
ce benî ’amir, yek sułtanê bî
zana we aman melûḧ emîr
çenî bizurgan çend řewşen zemîr
lwa we sêşwaz we çendîn î’zaz
pyade kerd emîr be sed ’îz û naz
gawgerdûn kerden perî banwan
be îkiram xas we menził lwan
dimay te’aruf řesim mîhmanî
pezîrayî xîł be mîzbanî
melûḧ û yaran dimay ḧeys û beys
teqaza wesłet leyl kerden pey qeys
mehdî we îkiram hurêza we pa
wat be umera û seran sipa
«ayha alamîrArabic» şay ’amîrîyan
goş deran be ’erz bendey dił biřyan
kinaçem kenîz xasey emîren
nijad û neseb, řewşen zemîren
ce benî e’mam ew xanewaden
êd ferdî ’adî, ew şehzaden
«eweł» kefa’et nîyen ce myan
be fermûdey wêş emaret bunyan
«sanî» qeys herçend ařastey famen
şehzadey bê ’eyb, xeylê xudkamen
ew ma’îl nîyen be kedxudayî
’eyal û ewlad, ya padşa’î
’aşiqanewar mewaço eş’ar
pey şahzadgan êden ’eyb û ’ar
řiswayî wêş û qewm û qeba’îl
bê terzîyey nefis kero wesa’îl
î kar û kirdar mayey mecnûnen
sewdayî bew tewr bedter ce hûnen
«salîsen» ’eyben wêtan mezanan
wesłet me’şûq dû new xewanan
mebo be wat wat dewr zemane
e’rab qeba’il lêm medan tane
damad «ne» ’erûs be dostidarî
yek emir muhîm ce beyn hen carî
î wesłet mewkûl be weqten taqî
qewmî qedîmî bimano baqî
î new’ wîsał gird muste’aren
pey şa û êwe û min her ’eyb û ’aren
êden ’erz min teqdîm welatan
ye ser, ye şimşêr çêşen selatan
minîç yek serbaz kemend we pêłim
wirdîter efrad qebîle û xêłim
ce watey mehdî şah û nedîman
cewabşan nebîn gird bîn peşîman
qebûł nekird hîç sîle û hedaya
mezîd kerd be ew çendî mezaya
wateş be du’a ya deway tebîb
beł ’îlac keran ew qeys ḧebîb
lwanewo pes mat û perêşan
girdîn peşîman ce watey wêşan
aman we ser kar qeys dêwane
we sed nesîḧet qewm û bêgane
xastir ban sed bar ce leylî mehdî
mawerîn perêt be şîrîn ’ehdî
be şertê î xûy dêwane destûr
ber gerî ce dił, ce xak bo mestûr
ce new ’erûsan sewł nazperwer
butan diłber gyan û řoḧ perwer
ce yaqût leban sîmîn binagoş
ẍalye pasan zîbay qeseb poş
mawerîn ce ew xuceste naman
ẍezałî herde, ahûy xeraman
yarê we yarî diłit binazo
çun şeker û şîr çenît bisazo
be watey mehdî temam mehteran
ce řûy řastî «gişt» bîn diłgiran
î dos axirş duşmenîş meyo
kê ce ’aqîbet, eymenîş meyo
mecnûn çun ejnî î hewał sext
bedbext bî, bedbext, wêş kerd we bedbext
ce qed û qamet bergiş pare kerd
ce qewm û ce xwêş wêş aware kerd
girewa be zar mewana eş’ar
ce mediḧ leylê be şîrîn şi’ar
mewat ẍeyr ce to leyl xoş xeram
wesił meḧbûban ce min bo ḧeram
leylê ce î ḧał matem û me’yûs
ce şadî meḧrûm, ce xem bî me’nûs
qeys û leyl herdû be xicłewe
seng syay serd dan be diłewe
leyl ce bedbextî û kem desełatî
qeys ce qisey tełx hem xicłatî
wat eweł baboy bułind payga
ce î emaret mekero nîga
be tîẍ û siper, muhîmat ceng
be’den be mał û genc giranseng
řewyey xwêşîyen řesim damadî
nek şehzadegî û efrad ’adî
xo kenîz nîyen leyl xatir teř
sułtan baboş bifroşo be zeř
êd wat û gina xamoş û medhoş
çun merdezemîn girt ne aẍoş
qewman û xwêşan řwałan be dew
be şîwen girten dewradewr ew
awerdeno yane be zarî û zigar
wîyaran be ẍem besê řûzgar
şeb û řo eş’ar ’aşiqane soz
mewat çun bułbuł neway dił’efroz
kej û koy kemer, bîdyo û byaban
medawe pawe tund û şitaban
ta yawa be deşt dameney duceyl
hewargey mexsûs pey xêłxaney leyl