birdin miluḧ şah qîs firzindiş bih twaf ki’bih
From the Book:
Leyla û Mecnûn
By:
Khana Qubadi (1704-1778)
3 minutes
996 views
bewateyyaran ’îmarî hewdec
ḧazir kerd çenî qeys biso pey ḧec
ce xasan wêş çend bizurgewar
amade kerdiş be şîrîn etwar
hedayay bê ḧed, naqey qurbanî
berden we derbar danay řebbanî
we nîyet ḧec bestişan îḧtiram
řû nyan we řay, bît alilh alḧiramArabic
yawan we ḧerem kabey mubarek
we lebbeyk, lebbeyk, tehye û tedarek
tewaful qudûm mekkey mu’ezzem
nimaz ce meqam, aw wardey zemzem
multezem çenî ḧîcir îsma’îl
ḧecerul eswed bosan be tacîl
sefawu merwe, mîna û muzdelef
koh ’erefat gird lwan be sef
şeytan kerden řecim, kerden qurbanî
aman we tewaf beyt řebbanî
melûḧ wat be qeys nûr dîde û dił
we perdey ke’be çing bider çun guł
waçe ya řebbî padşay şahan
tewbe û peşîman ce gird gunahan
be ełtaf wêt ce řûy řeza û meyl
ber kerîm ce dił sud sewday leyl
qeys diłḧezîn dest berd we bała
çing pêka we zeyl perdey beyt, nała
wat ey xudawend mubeřřa ce ’eyb
settarul ’yûb, pişt perdey geyb
ce dunya û ’uqba be tom hen îman
ce ridîn gunah tewbe û peşîman
biẍeyr ce mobet ḧeqîqet leylê
zyadter bo ce dił ce sabîq xeylê
çun ce sûretiş sanî’im dîyen
pey ’eşqî leylê manî’im nîyen
şerit her ew şerten pey leylim kerden
bazgeştîm nîyen ta be řoy merden
êd wat û berşî ce yaney ḧerem
řû kerd we sara derûn piř ce ẍem
baboş esasey sefer pêçawe
çenî hamřahan şî we kecawe
swaran xêł řwałan be dew
qeys dyan ne ko, girtin dewr ew
aman dest û paş bikeran we bend
watiş be yaran lêw be şekerxend
êwe û xudatan min xwar xestem
ce řûy bêřeḧmî neken destibestem
baboş be zarî girteş ne aẍoş
watiş ey ferzend daray ’eqił û hoş
řagey bedbextî megêře ne wer
mawerom perêt leyl nazperwer
qeys bî xatirşad, derûnş coşa
dimay çendîn şî’ir, lîbasiş poşa
şî we pişt zîn, cehan peymawe
çenî řefîqan hey be dimawe
aman we yane be xoşî û şadî
êł aman pêşwaz mubarekbadî
melûḧ mîhmanî mîhmanan kerdiş
herkes pey wêş tebeřuk berdiş
ce dimay tebeřuk, wirûd ḧecac
mecnûn bî melbûs zeřbefit dîbac
bira û xwaheran, pider û mader
şad bûn be ełtaf qeyûm qadir
qewman û xwêşan ’amrî fercam
aman we ser kar leyl cemîn cam