tercî’bendî nîştimanî «bendî şeşem»
From the Book:
Dîwanî Xadim
By:
Khadem (1895-1953)
2 minutes
459 views
xawenî ’ezim û sebat û sef diřî meydane kurd
menşe’î sîdiq û wefaw û řostemî meydane kurd
bo şeca’et řostemî załî lela wek pîre zał
bo sexawet ḧatemî la bazîy tîflane kurd
lay wekû bezmî zefafe řezmî meydanî mesaf
pence bazîy şêr û cengî řêwî la yeksane kurd
çawnetirs û dił nelerz û hem nebez řojî neberd
’erseyî ceng û cîdalî, la wekû seyrane kurd
barşî feyzî leser barîwe xakî fîtretî
boye teb’î bexşişî wa xawenî îḧsane kurd
bonîhalî keştî umêdî feqîr û bênewa
çî biłêm deryaye mewcî ya wekû barane kurd
zor hewaxwahî ẍerîb û diłnewazî bênewan
zore ewsafî ḧemîdey, to bekem, meřwane kurd
ger serî biřwa witarî nařwa be nařewa
xawenî ’ehdî metîn û ḧakmî peymane kurd
cewhere emma ẍubarî zułme cîlwey girtuwe
gewhere emma le zîndanî sedef penhane kurd
ger le coşî agira bê yarmetî hawřêy eka
bo fîdakarî wekû perwane bê perwane kurd
bo finûnî ḧeq peristî řast fî’il û řast qewl
qelbî safî piř le cîlwey cewherî îmane kurd
zor be herzan eyfiroşê em ḧesûdey mendebor
êste lem bazaředa wek yusfî ken’ane kurd
ser leser xakî mezellet her le bo xwa da’enên
gerdinî te’zîmî keç merdane, bo yezdane kurd
cahîlî wek xwêndeware ’almî ’ellameye
bem hemû fezłe ke eybînî jyanî jane kurd
zîrekî û ’îlim û şeca’et, řastî û merdî û sexa
aşkiraye lay hemûkes camî’î hemuwane kurd
řû le «mewla» ken lemewla, dest hełênin bo du’a
ta necatî bê esîre wa le naw zîndane kurd
(řebbî bedkarit bibînim kwêr û îflîc û zelîl
bête ber derget biłê haware kakî kurd dexîl)