12
ay ame
em wêneye ke nazanim key û çon û le çi katêkda gîrawe, wa destim be destî toweye û pelkêşim dekeyt... bo em êwareye ber destim kewt?.
em gişt yad û yadaştanet webîr hênamewe... birya herweku hemû şewanî bê’aramîm weku hemû şewanî firmêskawîm penam debirde ber ḧebekanim û řêm le yad û sextî jyan û dinyay demamkidar degirt... bełam nazanim bo û çon bû, boçî degeřam wa em wêneyem le nêw kitêbekanmida dozîyewe.
bişê tenya wêneyek, wêneyekî temen nadyar, dinyayekî xamoş û feramoşkiraw zîndû bikatewe?...
ewa ame
amey dayen û mirov
nimûney mirovî kiłoł
em wêneye
em yadgare dedřênim
bimbûre hey pîroztir le dayk
herke wênekem diřand û fiřem daye derewe, ew şewe her çîyekim kird nemtiwanî bixewm, hełsamewe û danîştim û giłopî jûrekem hełkird û destim daye qełemekem û herçendim kird cige lem çend dêře zyatirim pê nenûsra.
ame
ame mirdî
bo dwa car çawekanit leyek na û mał’awayît kird.
ew cûte çawaney
hemîşe aramgay minałanî zoł û aware û bêwe jinan û
derbeder û kiłołan bûn...
ew çawaney
bê aram û bê oqre bûn.
ew çawaney
firmêskekanî bûbûne derman û tenya
birînî hejaranî sařêj dekird
aram û diłnewayî pê debexşîn
hêz û twanay baweř bexohênan û serkewtinyanî pê debexşîn
bełê ame
firmêskekanî to
dermanêkî efsunawî bûn
diłit
ew diłe be soz û netirset
beheştî kesasanî şar bû
herçî xem û pejareyîyan hebû
to kirdibûnit be to û le kêłgekanî
beheştî diłda detřiwandin
beheştî diłit
hezaran hezar darî xemî tya řwabû
ke berî xendey dwařojêkî asudeyan girtibû
diłit beheştî hejaran bû
aware û derbeder
bêwejin û kiçî xełetaw
perî û firîştey ew beheşte diłî to bûn ame
ame detwîst
xwênî diłit bikey bew awe efsûnawîyey
tawanî tawanbaran bişwatewe
gunahî gunahbaran řast katewe
hemû diz û dirozin û cerde û qaçaẍçî
hemû fêłbaz û xwên mij û aẍa û derebegekanîş
bew xwêne pîrozey diłit řêgey řast bigirin û le xirapekarîyan dûr bixeytewe.
ta beheştekey diłit pîs neken
cêgat bo hemû kesê kirdibuwewe
ay ame... ay beheştî geřok û aware
ey hemîşe xemxiwarî mirovî bêçare
serit
nek beqed gořistanekey paşa koprî
nek beqed gořistane pîrozekey necef
nek beqed hemû gořistanekanî cîhan
nihênî çîrokî nenûsrawey temenî jyan
jyanî mirov
mirovî çewsawe û hejar
hejarî bê deretan... lenaw ew serey toda
aramyan girtibû
ey amey ser gořistan
ey gořistanî geřok û aware
serit
nezirgay xot bû
serit
îmam û pîr û pyawçakan bû
serit
dozexî hemîşeyî gyanî wêłit bû
ame serit
legeł ewey gořistan bû
herçî nizay mirov hebû
herçî nwêjî biřwadaran hebû
a lewêwe
bo baregay yezdan eçû
nexwênewar û kem dû bûyt
kesê fêrî nekirdibûyt
řewişt çîye?!
baweř çîye?!
kesê fêrî nekirdibûyt
mirov çîye?
xot tenha xot
xotit fêrkird
lenêw diro û fêłbazîda
řastît nasî, xotit fêr kird ke řastigo bî
lenêw řya û sed řûyîyda
yek řû bît û xot bo derkewt
xot han deda
xotit fêr kird keyek řûbin
lenêw diłpîsî û diro û kîneda
lenêw řiq û tuřebûn û îreyîda
diłpakî û hîmnî û çawtêrî û xawênît wedes hêna
lenêw tirs û lerzî bêkesanda
le kiřnoşbirdinî hejaranda
lenêw pařanewe û bê desełatî kiłołanda
hêz û serberzît wedes hêna
emanet kirde pîtekanî kitêbêkî
piprozî nenûsrawey têkoşanit
xełkit fêrkird
serberz bijîn
xełkit fêrkird
bo serbestî xobext ken
ey ame řeş
ey mirovî řastigo û yek řû
ey çawtêrî xawên û diłpak
ey serberz
ey serbest
ey ame řeşî dayen
ey mamostay nexwênewar
ey têkoşer
hîç kemtir nît
le řahîbeyekî derberder
hîç kemtir nît
lew kesaney ke weku pêẍember
namey xoyan
bemrovî kiłoł û diřende egeyand
ey ame
ey dayen
pêẍemberan namey xwayan pê bû bo jyan
toyş namey mirovit pê bû bo yezdan
ey mamostay nexwêndewar
daykî hejar
şew û řojit soz û bizet
hêz û twanat
xem û xoşît, pirse û şadît
hî xot nebû
mułkî hemû hejaran bû
her birsîyek
her bê çare û kwêrewer û awareyek
ger be astem nûzeyêkî le dem hatba
herkesê ba
hejar, birsî... dewłemend, têr
taku aẍa û derebegîş
ew nûzeye
le derûnî toda cêgîr ebû
ey mamostay nexwêndewar
destekanit
ay pîroz bûn
destekanit xwênawî bûn!!
destekanit quřawî bûn!!
zor car xwênî minałdanî afretê... bêwe jinê
kiçołeyekî xełetaw
debuwe xene û bizey şadî dexsite
ser lêwantewe
a ew xwêney buwe xene
mergî kesê... duwan... syan... bigre zortirîşî
pê deparast
xeney xwênî destit
abřu û nihênî bû
bełê ey mamostay nexwêndewar
abřu û nihênî bû
destekanit xwênawî bûn
destekanit quřawî bûn be şew...
nexêr em dêřaneş bê sûdin û ewendey tir birînim ekulênnewe, çît bo binûsim... ame gewretrî le nûsîn.
pêş ewey em çend dêřeş weku wênekey ame parçe parçe bikem, zû řûm le şuşey ḧebî tirîp tîzol kird eger şewanî ber le emşew ḧeb û nîwêkim qut deda ewa ba emşew dû ḧeb amade bikem be espayî wirde wirde ew çend dêřeyşim diřand û parçe kaẍezekanim fiřê daye ser parçe wênekey ame û giłopekanim kujandewe û berew cîhanî xewn çawekanim le yek na bełku singe řeşekey ame wek çon le minałîmda firmêskekanmî hełdemjî emcare xem û pejareyîm hełmijê û deste zibrekanî be mîhrewe bihênêtewe beserma...