hamderdan berden
From the Book:
Dîwanî Mewlewî
By:
Mawlawi Tawagozi (1806-1882)
2 minutes
1143 views
hamderdan! berden ...
řoḧ û dił û dîn we tałan berden
derûn we mewday xedeng řêş kerden
řîşey sebûrîm tata kêş kerden
we nêşî piř êş jarî marî derd
serapay e’zam letar letar kerd
we nûkî neşter połayî fîraq
piř ce zam kerden derûnî muştaq
cemîn qemerê, sîmîn sîm berê
mûyî kemerê, şîrîn diłberê
mişkîne xałê, yosif cemałê
meḧbûb celalê, leyl’asa ḧałê
seru bałayê, ḧorî numayê
xurşîd celayê, ẍîlman asayê
dîde ẍezałê, nazk xeyałê
duřdane lałê, saḧîb kemałê
qumrî sełayê, bułbuł newayê
lale lîwayê, ahû nîgayê
kebik xeramê, şabazî řamê
tezerwî namê, huma meqamê
dawwidî dengê, gułałe řengê
şede qeşengê, qumaş ferengê
wenewşe boyê, gułẍunçe coyê
behane coyê, ke’besa koyê
suleyman cahê, cam cem nîgahê
sikender şahê, dara dergahê
ře’na sadeyê, nîga badeyê
sehba neş’eyê, perî zadeyê
şox û şeng terzê, qed qamet berzê
sinewber lerzê, îta’et ferzê
hîcran dozexê, wîsal beheştê
nazk gułřuxê, ke’be keneştê
’îşwe û naz darê, yekta nîgarê
ḧîle û fen karê, germ bazařê
ẍunçe dehanê, tûtî zubanê
saḧîb zemanê şeker’efşanê
řeqîb demsazê, ẍerîb newazê
nazenîn gazê, ’aşiq gudazê
ebro kemanê, peykan mujanê
sewł xeramanî, mewlan nîşanê
yend tîrî nîgay bêmeylîş da lêm
yend jarî «sice»y hîcran werden pêm
ew kerden temam serapam çiłçił
êd fetar fetar kerden cerg û dił
xusûs şerarey xurşîdî dûrî
maran gaz kerden zexmî mehcûrî
mer labero jar we darûy wîsał
ya we merhem sêł zam kero pamał
werne arezûy jyan meḧałen
xeyałî ḧeyat fikirê betałen