herçenî nakaw demaxim tem bî
From the Book:
Dîwanî Mewlewî
By:
Mawlawi Tawagozi (1806-1882)
2 minutes
642 views
herçenî nakaw demaxim tem bî
syahewrî dûd nekellem cem bî
berq û birûske û tem daş we hemda
pilûskey sêław amam we çemda
xaşakî hestîm lafaw berdewe
derûn pêçiş da û dił wiyerdewe
zanam hemdîsan dił kosî noşen
gerdelûlşen arezûy toşen
coşiş werdebê çarî wêm nekerd
we herḧał ne beyn şertêman wiyerd
nek çenî xeyał qîblem bisazî
dexîl ten xesten we cyaş nazî
serherde û serherd, menził ew menził
dił ew şonî to, min ew şonî dił
dîm bed ’ehdîş kerd hewa sendewe
ten ḧesretmend bî cya mendewe
ce bêşertîy dił zametim sexten
wêt yawnewe hay nesîm wexten
řeḧmê ker we ḧał xeman herzanda
teşrîf ber bidye we ser berzanda
her cayê çun bext dûrî newhałan
sya bo tarîk ce syamałan
gêcî dûdî ax hewaş peř kerden
ane yataxgey xałoy hamferden
ga gêcî sersam ne gerdaweda
ga xeften ne toy xefet xaweda
ce neş’ey germîy heway kûrey meyl
cay tînîş kemkem ce nim bîyen keyl
wêt’asa we nerim wêt ne řûy nim der
bew şinoy fênk diłş bêdar ker
bełam şinyay tay ser surmey bêgerd
azar nedo hîç we say gerden zerd
meperso, sêław esrînan tawtaw
biřêz we řûda, êdiş der cwaw
siftekey sersam ten natewana
dîm xesten keften her êd mwana:
ye sextîy zamet, ye derdî muşkił
ye dûrîy xałom, ye bêşertîy dił
ecel nîm řemeq baqîyen sa dey
cewdima bextan mewînanit pey