hamderdan aman er menden hoşim
From the Book:
Dîwanî Mewlewî
By:
Mawlawi Tawagozi (1806-1882)
2 minutes
1479 views
hamderdan aman er menden hoşim
sedayê weşen meyo ne goşim
çiman zîłey zeng zewarî meyo
ziringey qafłekey weharî meyo
qafłeçî aman, daden dexîlim
binekdarî xem xeylê zelîlim
ne řay tîcaret emîrî welî
to mayey řewac ’ebas û ’elî
satê qafłeket sakin ne seyr bo
yek ’erzê dêrim: oẍirit xeyr bo
gêcî zirêwar hersim mewc werden
saray merîwanLocation temam heř kerden
bazeş henasem sub weneş dero
yex kero qetar asan buyero
emcar we sozen mujey coş werdem
ser nûkî qełem ax sorax kerdem
we bendî dûbad meynetî ciger
bûraze tatay cewałan yekser
qeyasey qayş posekey cestem
ḧełqey çełeme pêşey şikestem
řegî ten tałî tałwerdey sêweng
biferman yaran baran bidan teng
zengî diłey teng zayełey sedřeng
pêkyay tay derd řîşey xem gułeng
wizan ne gerden berzî pêşaheng
bişo bido deng firseng we firseng
meded ya ’elî pey sefer ker meyl
menził we menził ta menziłgey leyl
bełam her xakê cew asaneken
gerdî siftey gyan herasaneken
řeḧimit bo wadey wistey bareket
nebo we paşêl pay qetareket
ce zîłey ew zeng çun xeberdaren
meyo mişnasoş axir dyaren
meperso azîz piř wefa û beynet
kon tîcar başîy serqafłey meynet
waçe mer nedyet nemamî bêgerd
çêge parçey gyan payendazit kerd
yadî payendaz sewday serş bê
mamełey parçey gyanêwterş bê
bełam ce te’sîr coşî botey dił
demey henasey derûnî piř çił
sîmî qałî hers şewan bêdarîş
eşrefîy paktaw řengî řuxsarîş
řûkeş bî we kifit hûnî gułnarî
we mis minmana ce lay bazarî
bazařş kesas, řay benderş bend
kes nimewaço sermayeş we çend
we bazaředa we bangî bêşerim
megêław mewat we zayełey germ:
mayem nařewac, derûnim tengen
qafłem ta qam qyamet lengen