eyazî hemřaz nałe û ax û dûd
From the Book:
Dîwanî Mewlewî
By:
Mawlawi Tawagozi (1806-1882)
1 minutes
1613 views
eyazî hemřaz nałe û ax û dûd
’erziş hen we xak asaney meḧmûd
yawa, wat, namey şîrîn înşadit:
ney řemezanda neşûn ce yadit
nekerden îftar, dosekey kamił!
sîway we meykûs xeyałeket, dił
«fatḧey kitab» du’am, şew er řon
îltîmasî ḧusin xatmekey ton
ḧeq we lutfî wêş bawero ewřêt
sûdî sermayey ’eqîdekey wêt
werne min lafaw tawanan berdem
du’a řay dergay qebûł gum kerdem
neyçî! min pencey pay nałem siften
to dey çun te’sîr we nałet ciften
çend ferdî me’dûmPen name derûn ne weyda
bawer ce tenxiway nałe we neyda:
min wêm mizanû kam tomim kałan
yaran pey hîmmet wenem melałan
kerem der ne des řicay ewgaran
bo bexşem we ’eşq mezniney yaran
wextê goşey şar xamoşan bo cêm
nebûn we tesdî’ hamsayanî wêm