îmşew dyaren bangim bêşermen

From the Book:
Dîwanî Mewlewî
By:
Mawlawi Tawagozi (1806-1882)
 1 minutes  2323 views
îmşew dyaren bangim bêşermen
zayełey semtûr kellem we germen
seday zîl û bem meynet sed terzen
xefet şadîşen, xem demax berzen
hoşim bêhoşen, famim qamet qax
boy dûrîy azîz meyom ne demax
neyçî! direngen sa meker direng
fîday pencet bam, ney bawer we deng
her terzê pey wêş bikero řazê
gêro ne derûn her sazê gazê
bicoşo her kes we qed nałey wêş
binoşo her kes we pyałey wêş
celay her gerdê we sedayêwen
deway her derdê we newayêwen
her meqamêwet ciger tawin bo
tifłî bêçarey diłan lawin bo
ew seday derde xeylê diłkeş bo
dił tifłan asa bełkim diłweş bo
hey peşêwîy hoş, hey şêwyay fam
hey ’eqłî ’ebes, hey xeyałî xam
min û diłweşî û sefayî kerden
hûnî yekterîn ta we řoy merden
sa dey, saḧîb ney! řîşey dił ker pey
talîmder, eyferd we nezmekey ney:
îmşew we her ḧał şew we řo berûn
ey xwa sa mergê, seḧer çêş kerûn