meḧmû paşay caf yekêk bû le pyawe here ...

meḧmû paşay caf, yekêk bû le pyawe here gewrekanî kurd, ew pyawe bû ke legeł wesman paşay biraya deste ciłewî ’eşretî cafyan girtibuwe dest û hełyan esûřand, ew ’eşîrete ke xawenî çil hezar xêwet û le şekel û şîrwanewe dayangirtibû ta şaqeła û bis û mewlanawa. eme le layekewe, le layekî tirewe em paşaye wiłatanî dîbû, pyawanî gewre û koşkî walî û padşahî dîbû, le her layek gułêkî çinîbû, le her şwênêk edebêkî wergirtibû, le encama xoy bibû be pyawêkî edebperwerî kurd. bew zeka û edebewe serokî ew ’eşretey ekird ke heryeke le telêk lêyan eda û her yeke core eqłêkyan hebû.

bełê le řemekî cafa gelê pyawî jîr û dana hełkewtuwe, ebê hełkewê, çunke nesîmî derbendan û heway deştan ke têkeł be cirîwey estêrey asman bû, dîmenekeyan ekate karê ke lalẍawey fîkir û hoşî pyawî hewargeřî ew dîmene lêk bikşênêtewe û baweřî safî wekû duřiř derbiřê. wekû eme ebê gelê pyawî sawîlkeş lew koředa ekewête meydanewe ke asoy fîkirî tenha piřî mêşkekeyetî û hîçî tir! ca pyawêk ke serokî ’eşretêkî wa bigrête dest, ebê danayîyekey û firawanîy diłekey gelê gewretir bê le gewreyîy ew ’eşrete, eger wa nebê ’eşretdarî pê nakirê. řaste pêy nakirê; çunke ezanê emane be diłêkî safewe qise eken û qisekeşyan gencîneyekî gewhere bo zimanekeyan. boye meḧmû paşa hemû car legeł herkes le pyawî ’eşretekeda bepêy ’eqłî ew qisey legeł kirduwe û le pêkenîn bewlawe hîçî tirî nedawe be řûya, her em diłfirawanî û ’eşretdarîyey ew buwe ke kirdûyetye karê nukatî edebîy benirxî kurdî bo zimanî kurdî mawetewe û buwe be gułdesteyek boy. lemaneş wekû ewe ełê: carêk kabrayekî kurd kerêkî edzirê û lay kabrayekî tir be serî ekatewe û lêyan ebête miřumişt, le axra eçin bo lay meḧmû paşa bo şikat. emyan ełê: kerî mine û ewîşyan ełê hîy ew nîye. le axra kabray xawen ker řû ekate meḧmûd paşa û ełê: paşa we qewrekey ḧeme paşa, çon to enasim, awa kerekey xomîş enasim, îtir bêjim çî em kawraye lêm çugese çeqî le’neta û namdatewe! kabray tirîş ełê: desa pyagî dirozin ew qenney paşaye we qingî! dyare to paşa nanasî egîna kerî xotit enasîyewe! paşa bem qiseye dest eka be pêkenîn û ełê: bira biřo kerekey pê biderewe, kerî xoyesî, min xas enasê!