enîsî xeyał derdanî piř zam
From the Book:
Dîwanî Mewlewî
By:
Mawlawi Tawagozi (1806-1882)
2 minutes
1755 views
enîsî xeyał derdanî piř zam!
merhemî cestey xestekey nakam!
xeylên ne gêcaw beḧrî mehcûrî
ne dewrî duwey tenûrey dûrî
pûşekey cestem we pena keften
samî’em xeber yaran neşneften
înşełła, çenî xoşḧałî, şadî
ne şaxey şoxîy gerdûn, azadî
çenî weşbextî dû des ne gerden
’umirtan we ’eyş ’uşret wiyerden
nek çun min ce des bêmeylî diłber
mekêşû her sat hezar derdîser
daym dił řencûr hîcranî yarim
zencîrî cefay zułfî nîgarim
xusûs şerarey dûrî zor kerden
mezre’ey hestîm way sebûn berden
kes be wêney min piř meynet nebo
guruftarî dos bêbeynet nebo
hîç kes mubtelay dûrîy yar nebo
çun min sergerdan bêqerar nebo
kes nebo çun min yarî bedkaran
zamdarî mujey dîde xumaran
ce hajey hûnaw derûnî piř derd
ne gerdişî çerx gerdûnî çepgerd
ta ce to biřyam we mergit qesem
satê asayş nedyenim we çem
nekerî xeyał gileyî kerden
newaçî badey bêşertîş werden
er zelîlî des bêşertan nebûn
key mebo meylit feramoş kerûn?