key leylê çenî qeys bêwefa bî
From the Book:
Hewargey Diɫan
By:
Seyyed Taher Hashemi (1915-1991)
2 minutes
581 views
key leylê çenî qeys bêwefa bî
key wa miq me’yos meyl ’ezrabî
key xunçe perê bułbuł neşkawa
key qumrî ce sewł we kam nyawa
key şîrîn perê ferhad nenała
gîsûne řûy xak sara nemała
dû kes bêwefay dewr dinya bîn
to çenî tahîr, weys çenî řamîn
bełê, min somay dîdem diłber bê
min wêney ketan ew çun qemer bê
bełê, min bułbuł gułzar yar bîm
axir gîrodey ser nêş xar bîm
bełê, min řisway kûçey şaran bîm
bełê, min serjan cem’ yaran bîm
nimez teqsîrim, tawanim çêşen
weytewr ce ḧenam xatirit řêşen
çûn guł nîştenî ne diłî xesan
tane medey lêm wêney nakesan
guł key hamnişîn xar meyneten
diłber key bêbak, key bê beyneten?
řoy eweł zanam jar cefa nî
kogay meynetan dûr ce wefa nî
bełam min ferîb hamderdan werdim
baweř we wadey namerdan kerdim
qisey yaranim we řas mezana
namey dosanim seḧîḧ mewana
nezanam řasî kecî medo bar
dostî yaran, bîyen we guftar
ḧaşa ce guftar dos dujmin tewr
sed car beteren ce aza û qeder