hajey wefrawen
From the Book:
Hewargey Diɫan
By:
Seyyed Taher Hashemi (1915-1991)
2 minutes
834 views
hajey wefrawen ...
ce řaxanewe hajey wefrawen
hařey taf berz, qiłmey şetawen
weharen, gułan lare kiławen
hajey şetawan we herdaneda
seng medo we tał bêderdaneda
nesîm bo weş wenewşey baxan
têkeł we şinoy çinûr zaxan
medone demax derûn qełaxan
mebo we merhem daxmay daxan
wenewşe medo şêwey xał leyl
çinûr wêney zułf azîz piřmeyl
beřezamdiro we berzanewe
we şêwey kiłaf weşterzanewe
nałey qazî qułing, çirîkey çerxan
zîqey minałan ne şon berxan
azîzan gel gel ne sara û ne deşt
wêşan guł, bełam mekeran gułgeşt
we şadî wehar mekeran şadî
mewyaran we ’eyş î dinyay badî
sara piř ce ferş, zimřût kirdaren
ne řeng gułan gewher hezaren
bidye we sara û milew ser berzan
zumřût û yaqût çon bîyen herzan
şewan boy şewboy ’etir şadî xêz
boy nafey xuten wistenş we bêz
řem ahwan ne herdan çerde
lencey azîzan we yad awerde
sub ne serkiwan berek syawan
say berz meẍar kerdinş awan
bułbuł û qumrî pey guł we serwan
dax menyan we dił kemeney werwan
weru kiławan esirş bî carî
ce sam û heywet fesił weharî
pey kesê biboş sewday ’işq yar
hîç weşter nîyen ce fesił wehar