zerdewałekan le êwarey çwarşemmeda

pencerey jûrekey berew heywan kirawetewe, çen zerdewałe xoyan eken be jûrekeya be gîzegîz aramî û bêdengîy xeyałî eşkênin.

- daye...daykim kwanê?

- le metbeqe, boçîte?

- goyî le dengiman ebêt?

- nazanim... bo řołe gyan?

- daye to gwêt bêne...ełêm...řaste daykim şûy kirduwe?

kispeyek be diłya hat û diłopê firmêskî gewre exuşête sergonay û be lay lûtya eçořête ser lêwî.

- eme belay xotewe çipet kird? xo gwêt keř kirdim.

- řaste?

- bełê, to îtir lay dayey xot ebî.

- zor gunaḧ ebim.

- boçî řołe. wa mełê daykit gunaḧe ba şû bikat.min zor pîrim, newek bimirim. bêt û bimirim lanşînî lay bira û birajin ebêt.

- ey ke to mirdî min çî? minîş lanşîn ebim...daye lanşîn yanî çî?...kê bergim eşwat? kê xwardinim pê edat?

- xwa gewreye...carê namirim heta to ebî be pyawêkî gewre, ba manay lanşînîş her nezanî.

- daye xwa gewreye?...çende gewreye?

- zor...řołe gyan ...zor.

- le małîş gewretre?

- bełê

- çî le mał gewretre?

- nîştiman.

- çî le nîştiman gewretre?

- dinya.

- daye çî le hemû şitêk gewretre?

- xwa, řołe gyan...xwa le hemû şitêk gewretre.

- min daykim beqed xwa xoş ewê.

diłî guşra û firmêskekanî xořtir bûn.

- başe řołe kifir meke...egîna xwa gyanê kwêrit eka !..

- daye ... baweyş daykî xoy xoş ewîst, boye kwêr bû?

- na řołe gyan, bawe çaw’êşey bû.

- daye... eger daykim şû bika, minîş legełya şû ekem.

- to pyawî...pyaw şû naka....to lelay dayey xot ebî.

- ke pyawim nahêłim daykim şû bikat.

- başe řołe dwayî eçîn serdanî ekeyn.

- le małêkî tir ebê?...jinî pyawêkî tir ebê?...na min nahêłim şû bikat. şû bika be xom. ew hî mine.

- megrî řołe. megrî kuřim. dwayî serdanî ekeyn. êsta biřo topên bike ba nebîsê beşî xoy werhemî heye......

dengêkî berz, zerdewałekanî bo maweyekî kurt bêdeng kird. dengî mîmke sîma zor berz bû, henaseyekî hełkêşa, bîrî qisekanî ewsay kewtewe. çen legeł emřo cyawazin.

- bo şû nakey....cwan û ciḧêłî, ta goştit qîmet eka.

- sê şûm kird neḧesamewe...her lêyan edam...deryan ekirdim...jinyan beser ehênam...bexwa diłî «emîn»m naye....

-emîn? kuř hî dayke...gewre ebê xoy dê bolat...to çît bo daykit kirduwe, ewîş eyka. beyanî pêt ełê danenîştayetî şût bikirdaye...kes netî ewîst. řenc bexesar ebî....

-ew mindałe tawanî nîye.

-ey tawanî to çîye...lay daykit ebê. řołe be qisem bike xo kafirsanetî nîye ewanîş beşerin sîley řeḧim nagirin.

be laqirtêwe berdewam bû:

-her ewendeye dû car baweşt pya bika... emînî çî û ḧemînî çî...

niquriçkêkî lê girt.

bêzî lew qisane hestawe... pîrêjne çawdiřawe....

-wa mełê mîmke gyan heta mirdin min emîn leyad nakem.

dengî mîmke sîma ehat be bêzarîyekî zor zyatir lew řoje gwêy le qisekanî bû.

-daykim xotan kirditan be xotan...baş bwaye le sê mał eḧesayewe.

be diłya hat: - zor minał bûm...bêtawan bûm...jinyan beser ehênam...

mîmke sîma carêkî tir dengî hełêna.

-xo to serit le hembarî ardana sipî nekirdibû. kuř ełêy şazadeye, buxçey nekiraweye....bêwejinit bo bo hêna?....her mekirin....mekir. ewetanê lew řojewe hênawtane ta êsta çwar car kuřekey hatuwe bolay.

bexwa ewîştan pê bexêw ekat....mehêłe bîbînê...řêgay meden...jin melay şewe...lûtî pyamehênin.

diłî tund guşra. zerdewałekan kewtine gîzegîz.

(- min daykim beqed xwa xoş ewê...nahêłim şû bika...minîş legełya şû ekem.

- başe řołe eçîn serdanî ekeyn.

le małî kesêkî ke...jinî pyawêkî tir?...)

dengî xesûy ehat gwêqułax bû.

- çon etwanê, bexwa tenya řojê nahêłim be jinî bê. ca çon kuřî bo bexêw ekem...be tełaqdanî edem.

- kuřî ewîst, şûy nekirdaye...ewe min witim.

qisekanî mîmke sîmay bo ser yek ne’exra.

(- bo şû nakey...xo kafirsanetî nîye...ta cwan û ceḧêłî...bêwejin be mekirin...baş bwaye le sê mał eḧesayewe....tawanî to çîye....)

be bêzarîyewe lêwî xoy kiroşt.(her ewendeye baweşt pya bika...emînî çî û ḧemînî çî?)hemû gyanî bû be pepûleyekî řoḧ sûk û berew bonî gułe cê mawekey bałî girtewe....hesta çuwe berheywan.

hon hon firmêsk be çawekanya ehate xwarewe. çawî le cadekey xwar dêwe biřîbû.

tarmayyek derkewt. nizîktir buwewe...diłî xurpey kird. komełê zerdewałey wirûjaw dewryan da.

(- emîn gyan

- beynê tir kuřekeştan pê bexêw ekat.

- çon etwanê bexwa tenya řojê nahêłim be jinî bê...

- baş bwaye sê şûy ne’ekird.

- be tełaqdanî edem.

- daykim beqed xwa xoş ewê.

- başe řołe serdanî ekeyn.

- ba şû bika be xom.

- beynê tir kuřekeştan pê bexêw ekat...

- ba tund baweşt pya bika...emînî çî û ḧemînî çî?...xo kafirsanetî nîye....sîley řeḧim nagirin....řêgey meden....lûtî pya mehênin....baş bwaye le sê mał eḧesayewe....

- bexwa nahêłim tenya řojê...be tełaqdanî edem...bexwa nahêłim...

- daykim beqed xwa xoş ewê...zor gunaḧ ebim...

- baş bwaye le sê mał eḧesayewe...kuřekeştan pê...

- dayke...dayke gyan...)

zerdewałekan her eyangîzan û...

(- daykim beqed xwa xoş ewê...)

- daye...gyan

- biřo...biřo...emîn biřo...

(- baş bwaye sê şûy ne’ekird...gîzgîz.

- bexwa be tełaqdanî edem û...

- kuřekeştan pê bexêw ekat gîz...lûtî pya mehênin...řêgay meden.

- bexwa be tełaqdanî edem...gîzgîzgîz...)

- emîn...emîn...tełaq û...emîn...

(- daykim beqed xwa xoş ewê).

- biřo...biřo...tełaq...biřo...

- dayke...dayke gyan.

emîn bedem giryanewe her ehat û hestî be azarêkî gewretir le azarî berdekan ekird. leser dûřêyanî şeqameke tawê řawesta...seyrêkî daykî kird û bedem zirîkey giryanewe belay qebiristanekeda řay kird, heta le çaw win bû.

zerdewałekan , xoyan kird be kunî gwêçke û naw qij û lût û çawya...

êstaş le jûrêkî biçûkda danîştuwe. destekanyan bestotewe her ser řa’eweşênê û çawekanî derpeřîwin...seyrî ser qebran ekat...dengî mîmke sîma dêt.

- ḧey lałanim leng ken bo ew bûke cwanetan...řenge destyan lê weşandibê.

- nazanim...her destî bikeynewe çî ber destî kewê ḧeway eda û her ełê...biřo biřo.

carcareş ełêy zerdewałe dawyete demuçawî, be çwar dewrî xoya her pel ekutê û dûryan exatewe...êwarey çwarşemme bû...pêm wit meço bo ḧemam...xo hî êse be qisey kes naken.