ne hat û nehat dił maten îmşew
From the Book:
Dîwanî Mewlewî
By:
Mawlawi Tawagozi (1806-1882)
2 minutes
1071 views
ne hat û nehat dił maten îmşew
ełbet şinoy şew beraten îmşew
syahey defter mîrzay ezelen
zyadî û nuqsan řizq û ecelen
ew ha we berat bê’endazewe
êd we te’lîqey ’umir tazewe
kesê qûtiş nuqił řazî yaweren
yekê zîndegîş wesłî diłberen
hana hamderdan çêş mekerdê pêm
min dyam ne řûy teqsîm namey wêm
jarî dûrî dos azîzen noşim
nimeyo řazan şîrîn ne goşim
yanê ce şûwmîy bextî syay min
îmşew lerzan tûł tûłî tałay min
wełgî zîndegîm ha we hewawe
dîmadîmşen we bay fenawe
elweday te’rîx kameranîmen
nîşaney axir zîndeganîmen
yaran wiyerdin nobemen dey dey
îse wekaren saqî neş’ey mey
sa dey tay dugmey yexey dił pesend
azad ker çun dił bêderdan ce bend
peşêw ker laney diłan ce serda
goşey ’ereqçîn bawer we berda
mayl bo kemê ew ew goşey çem
goşey çem ew cam, cam ew ehlî xem
dewrit gerdî cewr dewran do we bad
naz waço binoş, ẍemzeket noş bad
ta fwarey wişk lûley pêşey řêş
her yek pirşey zûx hurşano pey wêş
we şinoy neş’ey mestîm wanowe
yek emcar ce des hestîm sanowe