mayey êş û nêş gişt zamanî sext
From the Book:
Dîwanî Mewlewî
By:
Mawlawi Tawagozi (1806-1882)
1 minutes
823 views
mayey êş û nêş gişt zamanî sext
bazûy tewanay bergeştegîy bext
řasen xo fełek çewaşey çepgerd
pey dûrî bałat şana morey nerd
bełam gyanekem ḧeyfen perê to
bêşertît bey tewr ne ’am meşhûr bo
min bîm xiřîdar kałay bałaket
min bîm we sergerd gerdî pałaket
ba’îsî germîy bazařit min bîm
celay ayîney řuxsarit min bîm
min sikem we nam meḧbûbît lêda
min řewacim da we şar û dêda
axir pey eẍyar ce min wiyerdî
ay bê beła bî, ane çêş kerdî?
misparût we soz henasanî serd
we coş û xiroş diłey piř ce derd
tep û dûy dûkeł henaset berz bo
nałet çun nałem ce hezar terz bo
her şew seylî hers we řûy řuxsarda
tof tofanş bo we her dyarda
xedengî çilçeng şot we cigerda
pencey bedbextît bidey we serda
ta beł new serdem beyo we yadit
rencî bêsaman berdey ferhadit