matemî û wehar bê şewqî û newguł
From the Book:
Dîwanî Mewlewî
By:
Mawlawi Tawagozi (1806-1882)
2 minutes
913 views
matemî û wehar? bê şewqî û newguł?
melûlî û gułzar? bêzewqî û bułbuł?
sub boy weş nesîm çun herdecaran
nimedo ne kax derûnî yaran
daxo ney serwext fezay weharda
kam tem ne ser herd qeza dyarda
seday «hay dêbay xeman» herzanen
sełay waweylay badam terzanen
mer gułşenî ḧusin şay guł’endaman
ce weyşûmey merg xezanş aman
ew bałay ałay terzî sehî seru
pêwe hêlaney diłan çun tezeru
kinya û xemyawe we dem řêşewe
tezeru asa nîşt we say wêşewe
tay beřezay şeng ’enber boy şew řeng
pexiş bî ne řûy taş ełḧed seray seng
ew koy nezaket we naz perwerde
letafet ce berg ḧerîr řem kerde
ne toy camey xak ḧałatiş çon bo
dek çerxe bextit her nîlgûn bo
bałî çem hurda nergis ney demda
çi xêr bî to çem nyay we hemda
çêş bî xêłxaney wêt ce yad berdî
rûy tełmît ew xêł ḧorîyan kerdî
rasen hemřazî ḧorîyan weşen
pey ’eşret dûrît derdê serkeşen
barê to û sefa û seyran û gułgeşt
hemsayey ḧorî û serdeştî beheşt
’eşret we pêçiş we zametewe
wew zamî ta qam qyametewe