min pêsem zana to piř meylenî
From the Book:
Dîwanî Mewlewî
By:
Mawlawi Tawagozi (1806-1882)
2 minutes
636 views
min pêsem zana to piř meylenî
derûn ce badey mobet keylenî
dûy kûrey dûrît mişo we tûnda
berdit dan we pay wefay mecnûnda
îse dîdekem êd dyarîyen
er çîwêt kem bo wefadarîyen
amoşoy we germ yaranî gyanî
we barî xatir nazk mizanî
boy bêwefayît çun boy wer zaxan
mido ne demax bextan qułaxan
şerit bo ta wey derd diłey tengewe
ser binyew we say sya sengewe
henî pêşanî řeng we xezan der
pay asaneket negêro ne zeř
dîdey korî hîcir bałay bêxewişt
newîno surmey gerdekey kewişt
ce şinoy nałey şew sozî zarî
segî asanet ne boş bêdarî
çem nim nedo toz ḧerîm çun caran
herzan kero bad dewa pey yaran
ce say dûy derûn sewdayî bêşo
neřenco sefḧey lay sewzey weş bo
daym heway yar piř beynetit bo
newînî kesê cay meynetit bo
biłêset berzan bigêro perêm
her bwaçî ax pey daxdarîy wêm
min wêł wêł gêłû herde û herdewe
her derd bo bidom we dem derdewe
ta řêzo we xak dił çun piř daxan
çend dax şîn we xak, êdîş ban daxan