zîley tełmîtbar koçî newhałan
From the Book:
Dîwanî Mewlewî
By:
Mawlawi Tawagozi (1806-1882)
2 minutes
769 views
zîley tełmîtbar koçî newhałan
te’sîrş nîyen îmsał çun sałan
yeqînen serxêł nazk nemaman
nekerden heway hewargey daman
bełê ye namey dił pê êşakeş
yekzey derûn ḧesret kêşakeş
ew sîne sîm weng, ayney cem řeng
minmano hewes ne dił day xedeng
ḧesreta ḧesret, hay ye çêş kerdî
çun cê wiyerdî pêşda wiyerdî
nim mido madey namş ew name
aw dindan asa, dindanî xame
nemenden quwet sermaye têşda
hersê bê ne řa hurmegno pêşda
pûş ayrîçim cay nesîm nîyen
hurkerde û berdeym ta we laş şîyen
payîz zeř, yex cam, çarşêwê hey tem
dêren swaren new’erûsî xem
mutrîb, yekaren, mer sya sengî
min bey ḧałewe, to wey bêdengî
ce tenxiway ney bezim xem weylanewe
hurder ey çend ferd we dîlanewe:
be werdey zamda dił taqet bêza
herçî bî yekser we çemda řêza
er hełay řemeq menden we tenş
bêmeylît lîbas kerden bedenş
çun xeyał we maç pat xoş ḧał mebî
kaş cekon ew bext leb tebxał mebî
yend dyan wew řa to mey nepêşda
dîdey dił nîga nemenden têşda
me’dûmPen name xem mayey fîkireket berden
ya pey diłweşî wêt ẍełet kerden
tow êste teşrîf azîzî gyanî
siften û te’sîr awî ḧeywanî