bab 16
1) û ke şemo řabirdibû miryem megdelî û miryem daykî ye’qûb û salome ’etranyan kiřî hetakû bên û çewrî biken.
2) û zor zû de řojî hewełî ḧewtiwîda hatne ser qebrî wextêkî řoj hełat.
3) û be yektiryan degut: «kê ew berdey le derkî qebrê bo me xillor dekatewe?»
4) û ke timaşayan kird dîtyan ke berdeke xillor bibuwe, çunke zor gewre bû.
5) û ke çûne nêw qebrî dîtyan ciḧêłêk le lay řastî řonîştibû û ’ebayekî sipî deber kirawe û zor tirsan.
6) beła ew be wanî gut: «metirsên, engo le yesû’ nasrî le sêdaredraw degerên. hełsitawetewe lêre nîye, eweta ew cêy ke ewyan lê dana.
7) beła biřon û be şagirdanî wî û be pîtros biłên ke wepêşû dekewê bo celîlî. lewê ewî debînin çilonêkî be engoy gut.»
8) û weder kewtin û le qebrî hełatin çunke lerz û sam ewanî girtibû. we be hîç kesyan çitêk negut, çunke tirsan.
9) û ke hełsitabû zû de řojî hewełî ḧewtûyda, hewełê bo miryem megdelî bîndira, ewey ke ḧewt cinnanî lê der kirdibû.
10) ew çû û xeberî be wan da ke degeł ewî bibûn, ke şînyan dekird û degryan.
11) û ke ewane bîstyan ke zînduwe û lewê dîtrabû, baweřyan nekird.
12) û le paş ewey be şikłêkî dîke bîndira bo dû lewan wextêkî degeřan û bo dêhatî deçûn.
13) û ewane çûn û xeberyan be wanî dîke da, beła be wanîşyan baweř nekird.
14) û le paşan bo ew yazdane boxoyan bîndira wextêkî leser sifrey řonîştibûn û serkoney bê baweřî û diłřeqî wanî kird çunke be ewanî ke ewî hełsitaw dîbûyan baweřyan nekird.
15) û be wanî gut: «biřon de hemû dinyayda û încîlî bo hemû mexluqê we’iz biken.
16) ewey ke îman bênê û te’mîd bikirê xełas debê, beła ewey ke îman nênê ḧukim leserî dekirê.
17) û ew nîşanane degeł îmanhêneran debin, be nêwî min cinnan der deken û be zimananî taze qisan deken.
18) maran hełdegirin û eger çitêkî kuşende bixonewe zerer bo wan naga. destan leser nexoşan dadenên û saẍ debnewe.»
19) dena lepaş ewey ke řeb yesû’ qisey degeł ewan kirdibû bo asmanê hełkêşra û le lay řastî xułay řonîşt.
20) beła ewan weder kewtin û de hemû cêyekîda we’zyan dekird û řeb komegî wanî dekird û kelamî îsbat dekird û bew nîşananey ke degełyan debûn.