diłtengîyekanî ferhad

çend geřawim
le şar, le dê
le nîştiman, le byanî
swênd dexom
nemdîwe kes
wek to kiçê
şeng û çeleng!
le naw kiçanî dinyada
her to cwanî!
bangit dekem
dem piř debê, le şîley guł
ewîn hetawêkî germe
henyey tenyayîm maç eka
bangim dekey
asman debê
be çarşêwî guł’estêre û
daristanî kipî jyan
piř debê le çirîkey bulbul!
şîrîn gyan!
pêş lewey bitnasim
tifengêkî yaxî bûm
girj û mon...
le lûtkey xomewe
ta berpay ’eşqî to
kewtime tilawtil!
êsta le qeraxî estêrkî ewînta
her wekû şořebî
xakeřaw laremil!
şîrîn gyan!
xerîkim şêt debim
toyan lêm bizir kird
axir çon
min bergey fîraqî to degirim.
eger zû neytewe
to xoş bî
min demirim!
şîrîn gyan!
le dûrît
bûgim be peykerî jan û êş
werewe, bixze nêw çawanim
zû be zû
detirsim, kiłpey agirî dił
bitkat be xołemêş!
şîrîn gyan!
diłtengim
şewdêzî xeyałim denêrim
swarî bew werewe
le wextê řoyştûy derûnim xezane
be destî nîgayek, bizeyek
delaqey dił berew
beharî cwanît bikerewe!
şîrîn gyan!
min eger xwa bayam
tenya tom dexułqand
demkirdî be tenya afretî řûy zewî
pesnî tom dekird be mesḧef û
řojane set řekat nwêjim bo dekirdî!
êstakeş...
min eger xwa bayam
qabîzim denarde xwarewe
afretî seranser řûy zewîn bimrênê
tom ekird be tenya xwajin û
îtir heta ebed
sujdem bo debirdî!