giftar dir byan mihacir û zikir ḧibşih û ançih rwî dad
From the Book:
Rewzetul Sefa
By:
Mirza Ebdilqadir Paweyi (1850-1910)
5 minutes
443 views
çend hedyey ’ecîb bê muzd û mînnet
perê necaşî û erkan dewłet
yekê êbin ’as ehil bedî’e
ew yek ’ebdułła êbin řebî’e
’ebdułła û ’umer merdan serkeş
ẍerez ta yawan we ulkey ḧebeş
we muqeřîban pena berdişan
pey amay yaran êzhar kerdişan
umeray dewłet gişt bîn be kefîl
hedye û tuḧfecat gişt dirya teḧwîl
qasêdan sucdey pay text berdişan
necaşî ce kar ḧałî kerdişan
çend kes ce qureyş xirûciş kerden
pena we cenab ’alî awerden
naga gişt yek yek wêney dêwane
pişt kerden we řûy xuđay butxane
xarc we ayîn ce gişt endaze
dînê cedîd û ayînê taze
awerdin cey dem taze we řûy kar
hîç kes neşneften ce řoy řozgar
ne terz ayîn nam aweranen
ne dîn sabiq pêẍemberanen
ce eşraf qewm gurêzan kerden
ce dîn ecdad wêşan wiyerden
to hem bizurgan we çem biđare
ewan be ême ce no bispare
mu’awdet deyn ce no we pêşan
bişan we mekan me’lûf wêşan
muqeřêban hem kerdişan teḧqîq
watşan xuđa biđero tewfîq
mebo muhacêr yekser we dewan
el’an bisparî we dest ewan
derdem necaşî şah xeyr endêş
ẍuřa ne cergey meḧreman wêş
wat qewmê pena be min awerden
min we cay pena û cay umêd kerden
çon mebo ewan ber kerûn we ber
biđewşan be dest qewm kîne wer
necaşî xeşmê ferahem awerd
cem’ muhacêr yekser tełeb kerd
erkan dewłet ce niza û ce dûr
yekser ce dîwan «ḧazir alḧizur»
fewrî kyana êncîl awerdin
řehbanan dewr gişt ḧazir kerdin
musłimanan wat çêş ama pêman
necaşî ce dîn meperso lêman
mebo cey demda çêş biđeyn cewab
nimez cew dima xeyren ya sewab
ce naga ce’fer ḧeq řazî bo lêş
bin ebî talêb pa nya we pêş
necaşî persa ce yaran xeber
qewł qasêdan ’ebdułła û ’umer
mewaçan êwe bed aman pêtan
bêzarin ce dîn ecdad wêtan
dînê tazetan kerden êxtyar
meşẍûłn daym be leyl û nehar
ew dîne çêşen fayêđeş kamen
kê danş qerar ya çêşiş namen
ne dîn musan «’ilîh alsilamArabic»
ne dîn ’îsan dayr bo ce ’am
me’lûm ken we min dił ne endêşen
ta bizanûn feził ew dîne çêşen
ce’fer êđ şineft ama we guftar
’erziş kerd watiş ke ey şehryar
ême cey werter gişt xatir şad bîn
meşẍûł we ayîn aba û ecdad bîn
kasb bîm û but peristî wêman
ḧeq pêẍemberê kyast perêman
be esił û neseb be sêdiq û yeqîn
be lutif û kerem be terz û temkîn
be ḧeya û be ḧêlim be mu’cêzey pak
be lefiz şîrîn ayey şerefnak
êmeş de’wet kerd be ḧeq perestî
bêđar bîn ce xaw nadanî û mestî
terk kufir û şirk kuffar kerdiman
sucde be xuđay waḧêd berdiman
ẍeyr ce ew me’bûd hen? mebo? byen?
me’bûdê henî kes be ḧeq nyen
ser meşq êđ dan pêman pêẍember
emir be me’rûf nehî ce munker
ta’et ḧeq wêş qerar dan ce ser
kyana be war perê pêẍember
selat û syam, ḧec û zekaten
ce ayey şerîf xuđa wêş waten
îman awerdîm «alḧimdillihArabic»
be dił be zeban «aminit balilhArabic»
qewł pêẍember ce laman ḧeqqen
ḧeq bîna û dana û ferd mutłeqen
cew bon terk dîn ecdad gişt kerdîm
sucde be xuđay bê zewał berdîm
çûn dar bîden, but bê semeren
muḧemmed şefî’ «yewm almeḧşerArabic»en
qewm hem çend daşan ezîyet pêman
ta gurêz kerdîm ce maway wêman
ême be fitway pêẍember ce no
gişt wêman wistîn we say penay to
ta zułim qureyş neyawo pêman
şaẍił bîn pey to be du’ay wêman
necaşî persa hîç hen ce latan
cew ayey şerîf kelam ełłatan
ce’fer wat bełê ey şah dana
suretî «kihî’isArabic» wana
bê şik te’sîrş seng mekerd be aw
dił ce derûn da mekerd we kewaw
necaşî we soz ewind kerd girîn
sikey sifîdiş teř bî we esrîn
muqeřêbanş yek yek bîn ḧezîn
gişt seyl esrîn řêzan we zemîn
watiş î kelam ce xas delîlen
nasix tewrat nesix êncîlen
me’lûm bo ce lay gişt suxen faman
her sê î kelam ne yek ca aman
cew dima watiş min î cema’et
perê řoy dinya hergêz yek sa’et
nimeđewn we des qureyş meẍrûr
eger pêm biđen behay yek kirûr
wat ce mułk min be feraẍet bał
binîşîn êmsał take hezar sał
berat û en’am međerûn pêtan
terxan û me’af sakin pey wêtan
êbin řebî’e çenî ’emru’as
na’umêd berşîn hem be na’êxlas
her kesê ezyet we êwe dero
bê ca mekero ser we seng dero
dest zułim kes neyawo pêtan
meşẍûł bin be emir me’bûd wêtan
take bizanîn keç baz çepgerd
çerx řozgar çêş mawero nerd