nişsitin şîru bir tixt şahî bi’d az fut xisru
From the Book:
Şîrîn û Xusrew
By:
Khana Qubadi (1704-1778)
10 minutes
450 views
bişnew ce şêroy şûm sya bext
xêza û xuroş kerd, tayn bî be cext
birûz kerd birût sya sitareş
ẍezeb xuroşa ne çîn çareş
dimay keyxusrew coşa bew culûs
dane tepił kûs neqarey naqûs
koya tepił kûs debdebey dehoł
soz sencisaz keřenaş be çoł
jendiş gebrekîy şadî liq be şeř
sikeş da ne sîm, zerbiş da ne zeř
sikey sełtenet be nam şêro
řayc bî řewac çun xurşîd ce ko
text xusrewî meẍłûb bî ce nam
ferman şêro řewac bî ne ’am
şêro betał kerd bazař baboş
tac tel pêka ciqeş be karûş
çawşan be çop çewgan zeřřîn
cařçyan şeş peř tawsî biřîn
besa dił ce sam sucde winara
serdaran ce sef kerdin sef ara
şêroy şeř engêz tundya be cext
tełeb kerd supa û serdaran sext
watiş: ha nucûm danay daweran
supa û serdaran perêm baweran
bizanûn herkes çêşiş bo xeyał?
çonen ce xidmet çun min kemer lał?
herkes nařezan be yek îşare
mipêkûn serş beser qenare
çawşan be çap hucûm berdişan
supa wiserdaran tełeb kerdişan
aman bê aman be sed hewlnak
be sucdey sucûd sernyan ne xak
midran be edeb ciger şikawan
lerzan ce heybet çun bîd ne awan
şêroy sya bext sedir sengîn dił
coşya be coş çun jar qatił
tund tełx û tirş dya be yaran
lerze nîşt ne cerg supa û serdaran
fermaş be cellad ẍenîm xûn řêz
kêşa saw seyf ełmasan têz
çend ce serdaran kerdiş sernîgûn
serhengan çend kes ẍełtan kerd cehûn
çend xan xayn serkeşan saf
tasnaşan cełd be ḧełqey tenaf
çend xwace û ẍułam cigere pare kerd
çend ser be serdar ser qenare kerd
xan û serdaran coqdan bê xîlaf
milerzan ce terz teřkey tûł taf
ẍuřřa bexuroş be awaz berz
sema sitêza, serdaran nelerz
watiş: supa û san çêşen řezatan?
çêşen keyxusrew řomeł ẍezatan?
çonen pey xusrew şor û şîntan?
zayełe û zarîy kes nedîntan?
ta îse xurûc xan xusrew bî
sitareş serdar, çerxiş ne dew bî
fermanş be feř, fełek yarş bî
firîştey firset sebebkarş bî
neřřad nerdiş nexşiş bexas bî
muhreş be mirad, tałeş netas bî
sikey sełtenet namş řewac bî
fermanş xurûc xerc û xerac bî
îse sitareş zar û zebûnen
tałeş ne tarî, tasiş nîgûnen
xusrew min kerdim ẍełtan çenî hûn
textiş çenî tac kerdim sernîgûn
henî çêşen şîn zarîy řoj û şew
fuẍantanen pey xan xusrew
be zeř mikêşû naz nokerim
mer min ce xusrew xeylê kemterm?
şerit bo binerûn tactan beser
kerûn mira’et ce ew zyadter
ce dîn diłber byawwun be kam
beş kerûn lêtan bad awer temam
be şewq şîrîn diłim weş kerûn
genc bad awer min be bad berûn
xeymey xusrewî beş kerû lêtan
mun’îm ban be mał be qeder wêtan
koko ce gewher duřiř deryayî
zîb û zeř û sîm dane û mirawrî
eşrefî be seng beş ken be lamał
tełay dest efşar kerûn we pamał
yede û beḧrîyan şabaz şahî
bibexşûn pêtan be xatir xwahî
lîbas layq xełat û în’am
feř fermayş sertapatemam
řengîn kerûn saf ce berg û be dew
nîga bidarûn xaster ce xusrew
er hen řezatan xeyał ken be xas
kemer bwînan xidmet be îxlas
werne be cellad têẍ bê dirêẍ
sa kerûn saman gerdentan be têẍ
penem den cwab çêşen sełatan
ey řaz û nyaz kerdim be latan
serdaran ce sef hucûm berdişan
be şerit edeb sucûd berdişan
watin: fîdatîm qoç qurbanîm
ne ferman to bende fermanîm
şimşêr mişanîm be îqbał to
ême çakîrîn, xusrew nebo to
yekser gyan efşan řoj mergenîm
ẍułam û noker nan û bergenîm
herkes xasteren be ew şakîrîm
herkes sexî bo be ew çakîrîm
ême du’ago be xammanen
çenê to dawa çi bammanen?
supa û serdaran ce ’ersey ḧîsab
bey tewr û şêro watşan cwab
serdaran be daw dadê wistişan
xanan pey xidmet kemer bestişan
xwace û ẍułaman aman be ferman
cařçî û çaweşan serdaran be eman
şêro êd ejnî ce yaran hewał
ce şewq û şadî şana peř û bał
daş be supa û san în’am û berat
xanan, sułtanan sertapa xełat
serdaran kerdiş cwahîr baran
xwace û ẍułaman hem şehryaran
bexşa be qoşen zeř û genc û mał
zeř da be îsper, eşrefî lamał
dane û cewahîr qatir û qetar
yaqût û zimřût metay bê şumar
dimay bexşayş ce şadî diłşad
bînaş kerd be bezim be «ḧisb lilradArabic»
xanan, sułtanan, serdaran pêş
nyan ne meclîs herkes ne cay wêş
meclîs be şadî cem ara be cem
nîştin pey şadî beraber be hem
tac û tel teła, kiław kemer zeř
mîna û muresse’, tac tawis peř
dêba perweran, tîp turme poş
zincîrey zunnar zêbay zeř nedoş
xan xana berg zeřřîn seranser
sułtan û serdar ciqe cewahîr
nîştin ne řûy bezim san û sułtanan
beg û begleran, key key keyanan
xerman ẍaret xeman dan webad
xeyał xusrew ber kerdin ceyad
xasey xoş xwanan sefay soz saz
lencey kenîzan pol bazî baz
cem bîn cem ara cergey serdaran
sade saqyan, sinicq winaran
çîn çînyan fincan feẍfûwir
şîşey suraḧî, pyałey bilûr
şem’ û çiraxan buryan û kebab
bîsat û bade û qeřabey şerab
da ne soz saz seday xoş aheng
muẍennî û mûkeş nałey def û çeng
çing da ne çil çeng saz semtûran
çar tar çaẍîr terz temûran
bazî baz be bał neẍmey soz saz
debdebey dimek, seday tepłî baz
soz neẍmey nay naqûs çil çeng
bûq bałeban awaz aheng
qûley qwaqû xêza ne cam řêz
bê xuf ce xuroş piřsan perwêz
sade saqyan cam badey mey
heya hey demdem keyanan key
ce şadîy şerab xêza hey xuroş
serdaran serxoş, xanan şîn ce hoş
ce ’etir ’areq şerab gułnar
sermestan ce ser nebîn xeberdar
şêro noşa noş mezey şehd şûr
pyałey biłûr badey kefit ne dûr
noşa peyapey pyałey şerab
neş’ey noşiş berd be mezey kebab
ce mestîy şerab mûş bî be zengoł
meẍziş xuroşa ce «kelley» kakoł
dêwya ce derd, dinyaş bêzya
dûrî ce kakoł «kelleş» xêzya
xuroşa be xîşim, coşya ce ser
awerd ne xeyał dîdar diłber
nała û nirkinaş be dîdey esrîn
noşa dûd dił pey dîdey şîrîn
çun kurey ahîr derûnş giřya
taw ce tewan send, taqetiş biřya
ce nałeş derûn xar derd dił
gêłya ce řeng çun jar qatił
birûz kerd birût bedîş ne xeyał
řengiş bî sya bedter ce zuxał
pêkya perdey derûnş be tîr
qetran bî ce qîn, qetranter ce qîn
şî ne xełwetê, qerar da ne text
xwace serayan tełeb kerd be cext
aman xwacegan xełwet wiyaran
sef sef be sucûd senceq winaran
be taw û tundî watiş be yaran
şehîdim, şîrîn perêm baweran
henî nemenden tab û tewanim
baweran perêm řoḧ řewanim
ha meken direng bawerdêş perêm
wer ne sewgendim be ayîn wêm
be ełmas têz cerg ciger çak
pare paretan miřêzûn ne xak
laşetan ce zam beden sed pare
sertan mipêkûn beser qenare
yaran ce şêro şineftin xeber
lerzan ce heybet ce pa ta beser
çend ce xwacegan cya kerdişan
ne şon şîrîn hucûm berdişan
řwałan be řem, qetre dan be dew
řijyan ne ḧerem ḧîcab xusrew
perde perweran bełed berdişan
şîrîn ne ḧucre peyda kerdişan
dîşan ke nîşten ne pişt perde
siftey sya poş azyet kerde
cemîn zexim û zûx derûn daxî
sertapa be berg sya qełaxî
ce gona û ẍebẍeb cemîn caman
tik tik mitkya zûxiş we daman
gêł aw û eşk dîdeş mida dor
her nam xusrew mawero be nor
miřêzo dîdeş hûnaw esrîn
kafir migrewa be ḧał şîrîn
yaran sucde dan be dîn dił řêş
ḧałat şêro watşan perêş
watin be şîrîn yaran be řazî
be şehd û şîrîn zuban dirazî
er sed derûnit derdîn derden
şêro be şîtab toş tełeb kerden
mibo to berîm, ser ha ne qeza
eger řezanî, weger nařeza
emir û firmanit pêman xełaten
êden ḧerfiman herçî sełaten
şîrîn çun ejnî ce yaran eḧwał
qirçya çun qeqnes, řêza peř û bał
xuroşa xemîn xemîdey xeman
çem da çun çewgan, çun ḧełqey keman
bendîy bar be lêw řenc řoj û şew
be dad derûn hana kerd: xusrew
ce endoy derûn, dîdey eşk amêz
dad û hana kerd: ce konî perwêz?!
bwîne ḧałim, şah cîhan gîr
şêro şîrînit berden be esîr
toş bestey zaman zûx gonago
nêş nasorş hem awerd beso
kulyawe zaman zûx to besteş
dêwya kûrey girpey ko besteş
xêza û xuroşa be nêş naxûn
wêş ełweła kerd, cemîn coş hûn
seyl esrînş be fware kerd
berg sewadîş ce ten pare kerd
be dûd diłsoz dîdey eşk amêz
dad û hana kerd, ce konî perwêz?
bişkafe ełḧed, kefen ne werda
ciqet lerzan ker carê ne serda
bwîne ḧałim dilêr şêr gîr
şêro şîrînit mikêşo esîr
ser horder ce xaw, ce kê qînten?
naşnext necat, canşînten
çêş mibo xîşimit binmanyewe
esîrit ce cewr bistanyewe
herçend kerdiş dad nebî eḧwał pers
neyawaş be dad ne xusrew nekes
xusrew be xeyał xamoşîy wêş bî
xeber ce fuẍan feryad kêş bî?
řûş kerd be yaran şîrîn be zigar
be eşk û esrîn dîdey endohbar
watiş: bê mirewt, emin çi ḧałim
siftey sya bext, sya zuxałim
sya sewadî berg doşmen
ce ko meyl saz ’eyş û noşmen?
be dîn şêro sed parem keran
řeza nimebûn mer serim biřan
yaran çend be soz semacet medlûl
watin be şîrîn, nekerdiş qebûł
ce ters şêro tundyan be taw
xuroşan be xîşim, be watey xiraw
yawan şe şîrîn qar û qîn û qes
kemend gêsûş pêçaşan ne des
be tundî û tekan, be zor û be çeng
kerdişan be kêş řûy ferş guł řeng
taw û tekan da xar xeter řêş
gyanş ’aciz bî ce kêşan kêş