ẍisil û şistişu dadin şîrîn bidin xisru ra az xun
From the Book:
Şîrîn û Xusrew
By:
Khana Qubadi (1704-1778)
5 minutes
396 views
dimay şor û şîn şeyday şor şew
ama be serkar saman xusrew
xêza xeraman şew şûm dêrîn
be soz derûn, be seyl esrîn
camey berg bejin hûnîn xusrew
sed parey ełmas têẍ deşney şew
ẍełtan hûnîn ḧerîr wałaş
kendiş serapa ce bejin bałaş
hûnalûy řeng best zûx zeyt amêz
cameş cya kerd ce bejin perwêz
be şîn û şîwen dax derdewe
perwêziş ce berg ’uryan kerdewe
dem dem mingera be perwêzewe
dem minya ne zam deşney têzewe
mibosa ẍebẍeb cemîn camş
beleb milêsa zûx ne zamanş
be aw guław ’etir û ’ebîrat
be muşk û mêxek deway zerûrat
kerdiş şustuşo ser ta be daman
ce hûn xencer, ce zûx zaman
pakiş kerd ce hûn be zarî zerûr
ẍusił û ’etirş da be sîdir û kafûr
şana pêşeda ’areq gułab
derman darûy ’etir muşk nab
pêçaş be kemend xasey hîndî baf
terḧ tebeřřu, baftey sûf saf
be ’etir ’areq kerdiş muşk amêz
pêça sertapaş be tay zułf dêz
danebetid daw ẍewwasan xas
yaqût û zumřûd ce seng ełmas
zîb û zeberced daney lał dêz
zeřkar zeřkeş text teła řêz
duřiř û cewahîr, daney dyarî
mercan û lûlûy lalay mirawrî
laşe û ne’iş naz xusrew bew qerar
nya ne řûy text kursîy zeř nîgar
şîrîn be şîwen nîşt ne balînş
yawa be gerdûn nałey nałînş
kerdiş řestaxêz nesil key keyan
ta sewad subiḧ seḧer bî ’eyan
şikawa şefeq beyan bêgerd
horda xyaban xeymey zîb û zerd
seḧer supay new ’alem kerd we pa
ce ḧał xusrew xeber bî supa
qaw kefit ne qoşen, supa xuroşa
zîlle û zelalet cîhanş poşa
san sefdaran aman be dewda
waran be laşey ne’iş xusrewda
diřîn yexeşan, berg beden çak
sertapay wêşan nyan ne řûy xak
xêza řestaxêz ẍewẍa be hey hes
gêsû kerdin qed, gerden kerdin pey
zîlley zelalet, zayłey zarî
waweyla kerdin pey şay dyarî
dima şor û şîn řoz řestaxêz
aman be serkar adab perwêz
kendin qebir teng xanan ẍemnak
keyanî xusrew siperdin be xak
çenî seraçey sengiş bi giłko
poşaşan perwêz be xak serko
şîrîn wêş bê şerim be awaz berz
noḧe mwana humîlane terz
nîşt ne serînş be dîdey nimîn
emanet şa mida be zemîn
zemîn emanet bada, hoşt bo
be keyxusrewan siperdim be to
ba lêt neřenco şah kemer lał
minet bar tom ta be hezar sał
şîrîn kerdiş şîn herta ke tawa
kêlş kend ce seng, giłkoş wiława
awerdiş bînay ce bunyad berd
be geç û acuř taqiş bîna kerd
sazaş gumezê ẍeyr ce xişt xam
zeř’efşan ce sîm lacîwerd temam
taqiş teła keş, dergaş dane řêz
pey yadgarîy nîşaney perwêz
xusrew xamoş bî be mewt medhoş
bêdeng û dwan ne xaw xamoş
girtiş menziłgey mał û maway no
seray seng serd, seywan giłko
ce zewq û zînet dinya mend tehî
bê yar û yawer, bêkes hemřehî
xeymey ’emaret newbedar şew
sef aray seyran nemend ce xusrew
dîdey dinya û dîn zeyn ’eyşiş kûr
kasnîş kawan ce mar û ce mûr
kałay goşt û post berg beden çak
morey êsxiwanş řêza ne řûy xak
darat dîwan danay kemer lał
ferman fermay ferd şahîş bî betał
dergaş bî derbest, qapî bî xapûr
horpêça seywan sef aray sitûr
serdar ser we gił, xanan ẍerq xak
kiław zeř nyan, berg beden çak
çawşan çewgan ne řûy çengewe
cařçyan ciqe dan be sengewe
xwace serayan kard û kemer zeř
tac û tel ne xak ẍuřřey şîn şeř
tîp kenîzan lałay lale gûn
kiław zeř nyan, tac û tel nîgûn
xwace û ẍułaman muresse’ kemer
yexe û came çak, xak û xûn neser
yede û beḧrîyan kemend perwerde
yał û dim qełem, temam pey kerde
supa sergerdan be zarî kerden
derd dił be coş dewar ne gerden
cîhan ta cîhan coşya be coş
pey xan xusrew bî we sya poş
şîrîn be şîwen be zarîda řew
hîmmet xwahî kerd ce xan xusrew
lwa be menził xatir xeter řêş
ḧucre nişîn bî ce yatax wêş
nała bi nałîn siftey sya poş
ce dûd endoh be zarî û xuroş
berg azyet derûn kerdewe
sernya ce pişt ne pay perdewe
derdîn dił řêş be dił giranî
nîşt be zarî û şîn deste ziranî
dił ce şadî û zewq dinya bestewe
desnya ne řûş xas kestewe