dîdin şîrîn xisru ra dir rixtxiwab bih zixim mihilk û zarî kirdin cihit xisru
From the Book:
Şîrîn û Xusrew
By:
Khana Qubadi (1704-1778)
8 minutes
227 views
şîrîn dîş ne xaw xusrew sernîgûn
kestîş nîgûnen ne gerdab hûn
gîr gaz şêr, çing piłengen
gîr û guriftar nêş nehengen
bew ḧałat sext zar zebûnda
her gêciş mwerd ne beḧir hûnda
ce ters ’ezîm twasa ce xaw
ce xof xayn herasa be taw
satê cey sewda ser berd ne hoşiş
goş da nałey zar meyo ne goşiş
dîş yageş mido mewc fewc hûn
destey zułfanş masyan ce hûn
dya dîş xusrew derkeften ce laş
na peydan xusrew, nemenden ce laş
ce xak ẍełtanen, keften sernîgûn
minało be zar ce dûdî derûn
dîş fwarey hûn mewciş ce lawe
mişano meyo ne semit şawe
coşay coş hûn mixêzo be coş
mitkyo meyo ce laşey lał poş
çun taf lafaw qełbezan be dew
mişano meyo ce semit xusrew
dîş xusrew xesten xar xeternak
ẍełtanen ce hûn cerg ciger çak
xuroşan hûn micoşo be coş
serkerden cedem we fenay lał poş
çun guł guław řewanen ce laş
meyo mido mewc ne dewran caş
řengîn kerden řext xusrew çun xezan
mitafo ce ters taf qełwezan
fwarey fiřan hûnş ne xuroş
coşan ne came û cergiş mida coş
şîrîn dîş zaman xestey kemer lał
qirça çun qeqnes, bî wêney zuxał
herçend be lałan lawnaşewe
ewende be zarî tawnaşewe
demadem midya be perwêzewe
dem mida ne zam deşney têzewe
herdem mibosa dem û damanş
milêsa be leb zûx zamanş
dem dem minyera bo we boşewe
midya be zaman řenceřoşewe
herçend lawnaş be zarî û xuroş
deng feryadiş neşneftiş be goş
şîrîn dîş xusrew xaren ce zaman
keften ce watey şîrîn kelaman
medhoşen ce hoş, nedaro ziman
ne merg mewten nedaro dwan
ne yagey zaman deşney têẍ têz
tik tik mitkyo ne cerg perwêz
qetre qetrey hûn zerd xeter xar
mitkyo ne cay jar alûdey jar
ga ga ce derdiş minało ce derd
ce taf taqan jar zûx zerd
ce zerb zaman jar alûdey jar
minało be soz, be zarî û zigar
new ḧał ḧałat dił řêş dêrîn
řêzo zûx zerd qetran qîrîn
be mewc mujgan be endoy esrîn
be nałan naz dya be şîrîn
kerdiş îşaret zîřa bê zwan
bê gifit û guftar, bêdeng û dwan
yanê misozo derûnim be taw
des nyaş ne dił yanê camê aw
şîrîn be şîwen xêzya be taw
awerd pey xusrew camê piř ce aw
tekyeş da ne pişt, zanû kerdiş xem
camş girt be dest, awiş da ne dem
xusrew xestey xar noşa neş’ey noş
karê bî ce gyan şî ne ḧał hoş
şî ne hîlaket mewt merdenş
nama we guftar wesyet kerdenş
cam cem aray cemîn bêgerd
zayf bî ce gyan, ze’feran zerd
qetran bî çun qîr, sya bî ce řeng
poşa ne dîdeş perdey tar û teng
qabîz be qullab kawişt kîneş
qerar girt be qesd ne sedir sîneş
perêşan perwêz be dîdey esrîn
bał çem hordaş dya be şîrîn
mujan da be hem, kêşa ah serd
esir hûnînş ce dîde ser kerd
leb da be lebda be dîdey nimnak
gyanş teslîm kerd be yezdan pak
xusrew fena bî be mewt medhoş
fewt û farîẍ bî ce xaw xamoş
şîrîn dîş xusrew bêdeng û dwan
be nałe û nałişt nama be zwan
herçend şa şaş kerd, şa nama be deng
şîrîn twasa, bî be nexiş seng
dîş xusrew bêdeng ne xaw xamoş
ce bêqerarî şîrîn şî ne hoş
xêza kefit ne řûy ne’iş xusrewda
řêzna esrîn hûnîn new şewda
dest mała we bejin xestey xar derd
dî dya laşeş bî we seng serd
şîrîn be zarî zîřnaş be zar
banû begleran ce xaw bîn bêdar
xwace serayan bêdar bîn ce xaw
coşan kenîzan sîm û zeř kiław
kiław zeř řêzan taqî teła řêz
çopî çemeran ne dewr perwêz
xwace ẍułaman kard kemer zeř
banû kenîzan tac tawis peř
nîştin we şîwen xusrew ne, şewda
waweylaşan bî ne řûy xusrewda
ce ser ta daman yexeşan diřîn
gêswan be kard ce bêxda biřîn
teřlan tetaran turk tuḧfe pêł
muşkîn ẍezałan perî perde gêł
şahên şabazan kiławe kende
ketûn kiłafan pexiş peřgende
xwace serayan tac û tel nîgûn
kemer kiław gêł ẍerq xak û xûn
xara xeyałan wała û ḧerîr pûş
turme tedarek sûf mimor poş
sertapa ne gił esrîn fware
şehîd şîwen, yexe sed pare
taftey teła poş zeřřîn kiławan
sîne û sûret çak, wêł wiławan
nober nemaman nazk newhałan
çopî dan ne dewr şay kemer lałan
zayełey zarî şeyday şîn şew
bang waweyla ne dewr xusrew
şîrîn be zarî serwîn kerd nîgûn
beyan kerd eḧmer be nûk naxûn
zułfan be naxûn ta ta şendewe
xałan be naxûn yek yek kendewe
gêsû kemendan destey zułf dêz
qed qed qed kerdiş be ełmas têz
ser text sîneş be sed pare kerd
xałan ne cemîn wêş aware kerd
zeřřîn zengûłan lerzane û lagîr
ẍełtan kerd ne xak zeřřey qehir qîr
zeřtan zeř baf taftey teła řêz
wałay guł gezîş ne hûnda kerd dêz
dest xusrew girt soz nałînş
sergirt ne aẍoş nîşt ne serînş
milawnaş be soz zarî be nazan
mer xusrew çenîş beyo be řazan
xusrew xeternak ne mewt medhoş
bêdeng û dwan ne xaw xamoş
nebîş ḧał û hoş diłdar dêrîn
řêzan kerd be řaz şîrîn be şîrîn
watiş fîdat bam kemer lał key
bur şêr şiko, hujebir hey hey
ye çêşen xeyał xefit xawten
xaw xak û xûn ce ko bawten?!
ser horder ce xaw, fîday xawit bam
newey newşîrwan fîday nawit bam
ba dergay darat daray kemer lał
qufił û bend nebo ta be hezar sał
seḧer serdaran sergerdan meker
xanan ce xizmet peşîman meker
cařçî û çawşan întîzar meker
xwace û ẍułaman tar û mar meker
samanim sergûn, bazařim berbad!
pey ferhadim řo, pey perwêzim dad!
textim be tałan, tacim nîgûn bo!
şêr şeca’et, hey ferhadim řo!
şêr şehîd bo nenîşo be şad
sułtan û serheng serweranim dad!
şîrîn be şadî nenîşo ce no
xan xusrewey begleranim řo!
nenîşan be şad puł perîzad
pey şapûrim řo! pey perwêzim dad!
nasor keftey zûx zamanim be so
ẍerîbîy ferhad bêstûnim řo!
pey hana ce des şêroy ẍezeb xû
derdîn dił řêş kenîzanim řo!
fuẍanim ce des sitarey çeftim
herdem be tewrê mişêwyo bextim
ce çeftîy çarem, ce şûmîy bextim
ce bextê daştim, ce řojê keftim
daym derdedar, dił be coş min!
her azyetbar, sya poş min!
şûm bed exter, çare çefit min!
ten ahîrîn bar, sya řext min!
çend kerdiş feryad fuẍan û bêdad
ewweł pey xusrew, axir pey ferhad
bêdadim ce des çerx dûna dûn
zemaney sifłey bê şerit û bê şon
dołab dewran qezay nexiş tîr
zułim û sitemger, zar û zebûn gîr
qezałey qatił, qezay qîn qest
nexiş tîr endaz şûm şore şest
kes ta ser ne say çerx çepî waz
ce dam dewran nebî ser firaz
dewr dûnadûn mayey mekir û fend
çerixt çemer bo ta hezar û end
xak adem xwar, ne ẍem nîhanî
seray sernîgûn, fend baz fanî
berg qełaxî be kê nepoşan?!
cam badey merg be kê nenoşan?!
řaz řimûzat řagey kes nehat
mwat kêt neberd ne maway memat?!
ecel ne qapîy kêt nekerd kemîn
kêt beser ender nawerd be zemîn?!
qabîz qebiz kêt neda ne defter?!
fitway fewt kêt newana ce ser?!
dewran kê ce to berşî ser azad?!
ferman şadîy kêt neda be bad?!
axir ser nwîşt ser’encam sał
fitwa day be fewt kar kemer lał
şîrîn bey destûr xusrew lawnaş
be soz zarî tewen tawnaş
kerdin şor û şîn xan xem xełat
fa’îdeş nekerd, neyîş destełat
be řêzey esrîn, ab eşk şor
te’rîf û teḧsîn awerdiş be mor