dir xwab dîdin xisru ḧizirit risul û niqil kirdin xwab xud cihit şîrîn
From the Book:
Şîrîn û Xusrew
By:
Khana Qubadi (1704-1778)
4 minutes
433 views
qafłe salar gewher firoşan
ẍewwaş luccey beḧir xuroşan
be řeḧşey muşkîn mu’enber qełem
ey namey namî bey kerd řeqem
xusrew cem qedir humayûn exter
ama ne xawiş salar meḧşer
dîş nîşten ne pişt buraqê çun berq
ser ta paş ce şewq şu’ley nûrda ẍerq
leb piř tebessum çun ẍunçey newxêz
ce řay merḧemet fermaş be perwêz
bo hey cewanmerd cey nadrustî
ce řay napesend ateş peristî
biters ce ahîr soznidey seqer
ateş peristî xas nyen, meker
cey fî’il şenî’ şerten şehryar
bikero be sîdiq tewbe û îstîẍfar
xusrew da cewab seyîd muxtar
’uzir xway meḧlûq ce «yum alqirar»
wat: er mikeram pare be xencer
ce ayîn wêm nimeşûm weber
êd wat xusrew, dîş yek nêzedarê
wist ne ebro çîn, çapuk swarê
tawda be tundî çun bad pêş yawa
be ḧerbey xûn řêz cergiş şikawa
bêdar bî derlad şay feřřuḧ syer
zayf bî ce zerb salar meḧşer
ew şew be xełwet tełeb kerd şîrîn
be mişkoy bo muşk peyker ’ebîrîn
wat: şîrîn îmşew yek xawim dyen
ce xof ew xaw ’umirim kem byen
bo her dû bişmê be kunc xaney genc
pey defi’ ey xaw meynetîy dił řenc
çind dane yaqût, çend lał û gewher
çend durc ’ebîr, çend tebłey ’enber
kała herçî hen ce xas ta be kest
bibexşîm be ehil fuqera û tehî dest
şîrîn êd şineft horêza be dew
şî be genc xane ew çenî xusrew
nîga kerdin dîn çend hezar deste
xerîtey zeřbaf bezencîr beste
dîşan ne çend ca çend genc nayab
mer her xudawend bizanoş ḧîsab
çend ca hem ce genc, ce duřiř şehwar
meḧkem gişt be qufił połay zeřnîgar
awerdiş kilîd nexşan gencûr
siperd be şîrîn şay wala destûr
horgirtin dergay ew gişt xezêne
ew xezêney genc sed hizar wêne
çoge şehenşay tac û kemer zeř
dîş yek sindûqê ce seng meřmeř
gencûr «ḧisb alamir» perwêz xusrew
kerdewe qufiłş be dewan dew
dîşan telîsmê ce sîm sade
aw befir ne toy qirimzî dade
xaster ce sermeşq manîy guherbar
muneqqeş be xet řeyḧanî ẍubar
awerdin pîrê firawan dana
nam ew telîsim perêşan wana
dîş ke erdeşêr babekan dewr
nwîsan ne řûy ew telîsim bey tewr
be îradey zat bexşindey bêçûn
ye çendê qeřnen ne dewr gerdûn
şexsê ’alî qedir ’ezîz serwer
şefa xwarî xełqen ne ’ersey meḧşer
namey řîsałet xetmen be namş
mî’racen payey kemter meqamş
îsimş eḧmeden ew ’alî neseb
esiłş hen ce nesil qebîley ’ereb
sełaḧ her êden ne dewr eyyam
çi şa, çi derwêş, kaffey xas û ’am
be řîsaletiş baweran îman
werne ce dareyn miban peşîman
xusrew çun be şikił ew xet nîga kerd
ne perdey derûn kêşa ah serd
wat: şikił ey xet şox bo guław
çun ew swaren min dyen nexaw
persa ce şexsê nadîrey řûy dewr
kes dyen şexsê bey şikił û bey tewr?
watin: şexsê hen saḧêb tedarek
’enber bo kerden mekkey mubarek
xuda kyasten be peyẍemberî
nyan ne ferqiş tac serwerî
muḧemmeden nam, ’ezîzen namş
ḧeq be feził wêş kerden îkiramş
şa ke êd şineft temam bî dił teng
çiman ne ferqiş dirya parey seng
wextê dîş şîrîn şox bê endêş
şa perêşanter ce tay zułf wêş
watiş be xusrew hey şay cem nîhad
berazendey tac text keyqubad
ey hû çend sałen ce ême werter
wêney erdeşêr şêr hunerwer
er nebya be řas ne řûy ’ersey dewr
pey çî telîsê minwîsa bey tewr?
ełbet ew şexse saḧêb ḧîşmeten
řehnumay kaffey mułk û mîlleten
bîlla er mişî ne řay dîn ew
xusrewî taser wêney keyxusrew
ne řûy serzemîn kamgar mibî
berguzîdey zat kirdigar mibî
xusrew wat: şîrîn ḧerf to řasten
ew şexse êzed be ḧeq kyasten
çon bikerû terk, bełê waçe pêm
řewyey xusrewîy aba û ecday wêm?
ce řesim şahan destûr dêrîn
şerim manî’en horgêłûn şîrîn
řazî nîm ce terk dîn abay wêm
herçî pêm beyo biła beyo pêm