nisîḧit kirdin şîrîn xisru ra
From the Book:
Şîrîn û Xusrew
By:
Khana Qubadi (1704-1778)
1 minutes
215 views
neqqaş ey nezim şîrîn bey destûr
kêşa neqiş muşk ce sefḧey kafûr
muşk boy mêxek mudbîrî xuten
perwerdey muẍan yatax ermen
guł boy şeker leb şeker řêzey řaz
şîrîn şeş dang nazk ẍemze û naz
şewê ce xełwet wêney şem’ şew
nîştebê şox şox ew çenî xusrew
bey tewr pey perwêz tac û kemer zeř
řêzna ce durc yaqut lûlwî teř
watiş: ey xusrew danay xîredmend
wêney babay wêt çêş mibo yek çend
çenî supahî û noker bisazî?
bitersî ce merg, mezłûm binwazî?
demê hem be ’edił miskênan ker şad
memleket be ’edił dadit ker abad
ḧezer ker ce çeng serheng ecel
qełay zîndegît bikero qebel
xof kere xusrew subḧê ya êware
du’ay mezłûmê lêt bigno be kar