ti’rîf cilal padşahî xisru
From the Book:
Şîrîn û Xusrew
By:
Khana Qubadi (1704-1778)
6 minutes
482 views
zeřřab zeř senc ey zeřřabxane
bey tewr pêka sikkey şahane
çun xusrew şahê sureyya efser
encum îḧtîşam, melayek nezer
ce qaf ta be qaf, ce mah ta mahî
nenîşt ne řûy text ferxundey şahî
řoy heyca hucûm hujebran ceng
keffey pêł ebłeq, gił koy xedeng
nałey nay zeřřîn nirkey niqareş
seday çerim kûs guřey qûnpareş
qurtey qurtemey fîlan cengîş
neřřey hujebran piř sam sengîn
supay sehminak şahan cem cem
mikerd çun ser’î aşfite û sersam
esḧab te’rîx û yerdey sałan
danayan pêş, saḧêb kemałan
ce pêşgahşida maçan subiḧ û şam
midarbê penc sef ce xas ta be ’am
ewweł sef ce ehil daray bê endêş
duwem gedayan bê newa û derwêş
sêyem bîmaran xestey xatir teng
ce zor azar ze’feranî řeng
çarem bendyan ’asîy mustemend
gerden be zencîr, pa bend be pabend
pencem hûnyan ’asîy xetakar
dił piř ce meynet çerx keg řeftar
ye gişt fayz bîn be lał bexşîy ew
sena xwanş bîn be řo ta be şew
qapîy wêş bi ’edił, be însaf û dad
kerdebê çun mîsir be şekker abad
ewreng şahîş be şikił gerdûn
ce daney yaqût, ce duřiř meknûn
řesed bestebê be qurs xurşîd
be mah û behram, bercîs û nahîd
be sayr necim burc menazîl
her çêwe be ’îlim nucûm bo şamîl
ẍerez be terkîb çend dane û gewher
direxşan çun qurs xurşîd xawer
sewabît temam ta seb’ey seyyar
deqîqe û sa’at, be leyl û nehar
exter şinasan eflatûn cenab
be cayî muḧît qurs usturlab
her çar goşey text şay fełek efser
kerdebên menqûs çun çerx exzer
ew textida se’d û neḧis her nucûm
exter şinasan mikerdin me’lûm
teḧtê bew destûr e’lay humayûn
muzeyyen çun seqif sîmabîy gerdûn
hîç padşahê keyxusrew şyem
ne ’ersey dewran nedyenş weçem
berz bî çun perwîn payey şewketiş
wesî’ bî çun çerx xwan nî’metiş
her řo ce řêzey sifreş parseger
miberd azûxey sałê zyater
nebî ce dewrey dinyay beynet kem
be wêneş ne «seyf» ne «me’in» ne «ḧatem»
biłê her kesê saḧêb endêşen
’alî hîmmeten, sexawet pîşen
er derkarten se’d bo encamit
çun be’zê bizurg menşûr bo namit
ba be sexa û meyl, be bexşiş xût bo
kaffey xas û ’am her du’a got bo
emanet ferzen, xesîs gumřah
mewaneş bizurg er mibo be şah
pey çêş? ke xesîs çem teng çun gurgen
çem teng xesîs ce ko bizurgen?
ḧeq pey êd bexşan be to mał û genc
bidey, bibexşî bê lar û bê lenc
xo wêt mizanî genc û mał temam
be ca mimano axir ser’encam
qarûn ke tepił genciş mijenya
ẍeyr ce ah serd çêş berd ce dinya?
sa toyç çun xusrew cam cemşîd cem
mertebey şahîş zeřře nebî kem
be genc efşanî ba daym xût bo
zumrey xas û ’am her du’agot bo
tebi’ humayûn ew şay ḧatem tewr
bew tewr mayl bî be bexşiş ne dewr
mibexşa be ehil feqîr subiḧ û şam
xorş çenî zerf, badî çenî cam
wextê mikêşa te’am be çend řeng
zerfiş řûy zemîn migirt sed firseng
bes ke bî çend řeng ḧełwa ne xwanş
ce serfiş ’aciz mibî mîhmanş
be wext û bê wext ’ûd û ’enberş
xerac hînd bî xerc mecerş
destûr adab ew şay cem nigîn
bey tewr bî ne řûy ’ersey serzemîn
ce ẍewwas beḧir duř şeb efroz
şa be damen zeř misendiş be soz
her şew yek dane cew duřiř xoşab
misawa û mikerd serf çenî kebab
pey çêş! nafî’ bî xeylê pey quwet
hem pey řefi’ derd serdîy řutûbet
maçan yek espê tazey erzeq çem
be şîr perwerdey qetaran řem
sertapay ew esp meẍrûr newzad
mu’etter be ’etir řîḧan beẍdad
be ferman ew şay gerdûn kîrbaş
zebḧiş mikerdin be têẍ ełmas
perêş mijendin tenûrê ce sîm
mikerdin xerciş dexił yek îqlîm
perê buryanş be cay hêmey xuşk
misoçnaşan çoy ’ûd bo muşk
daym her kebab ne xwanş êd bî
tenûr alet buryanş êd bî
te’eccubter êd ew şay dara feř
bêşterce hezar hefsed misqał zeř
çenî şîrey qend nuqił û engebîn
minya ne goşey her xwan řengîn
wextê ke midî muḧtacê ce dûr
ew xwan û aw zeř, çenî ew tenûr
mibexşa peneş ne řûy bîhterîn
aferîn xusrew, hezar aferîn!
çun řoyê henî ce yaqût xor
řengîn mibî řeng sîmabîy seḧer
baz hem ew esbab ew nadîrey dewr
tenurê bew terḧ, xwanê hem bew tewr
ce «mudة al’umirArabic» her êd bî karş
bey dad û bexşiş germ bî bazarş
bełê sa wextê ew yawa wextiş
textey çoy tabût bî be cay wextiş
nama be karş ew padşahî
ew bexşindegî û ew dad xwahî
emma ce řewyeş dił pê şikawan
firê kes be feyz se’adet yawan
deytir çêş waçûn ’arfan ’ehd
sexa pîşe merd, bê sexa namerd
er nedo ahû dem ce peřey guł
ce nafiş boy muşk key mibo ḧasił?
er derkarten suḧbet bew enwer
be şem’ îḧsan çirat řewşen ker
er saḧêb ’eqłî, piř şu’ûr û hoş
bo we’iz «xanaPen name» bigêre ne goş
ce bê dewłetan şûm şeytan řeng
bûyer be îḧsan çun ney çoy xedeng
eger mitawî bigêre peywest
daman saḧêb dewłetê be dest
pey çêş? her êden pey xud pesendî
řewyey bizurgî, řay danşimendî