namh firistadin şîrîn bih nizd xisru
From the Book:
Şîrîn û Xusrew
By:
Khana Qubadi (1704-1778)
3 minutes
272 views
qasîd awerdiş be dewan dew
cewab namey şîrîn pey xusrew
dya be namey şîrîn ermen
xusrew çun tûtî bî şeker şiken
ḧeyran mend be nezim bo ’ebîrînş
be ḧełway mezmûn tirş û şîrînş
şehenşay cem bezim sureyya serîr
axir şî ne fikir xezaney zemîr
wat ye cewaben ne ẍewẍa û cengen
kułox endaz her padaşiş sengen
be sizay kesê namey naxoşê
binwîso welay şox serkeşê
axir çun miryem badey mewt noşa
xusrew pey şîrîn hem cergiş coşa
pey çêş? ke miryem şûm dił ce seng
çun xar pêkabê ne damanş çeng
hîç nazaş hergîz ew zułf ’ebîrîn
xusrew bwîno dîdar şîrîn
cew sebeb xusrew ce dest miryem
be şew ta be řo her mikêşa xem
wextê ke fewt bî ew keywan meqam
ne řûy ’ersey dewr meḧfûz bî temam
bełê camê aw ce pey bê kemał
weşteren ce ’umirpiř ’eyş sed sał
pey çêş? ce dimay xesmê serkeşen
řwê buyarî dinya her weşen
çunke şa ce dest ew şeytenetwar
wiyaraş çendê be tał řozgar
ce new tełxîy ’eşq ew ce ḧed wiyerd
ce şîrîn dîsan şeker derxiwa kerd
be çerbî û nermî çend namey şîrîn
kyast pey şîrîn zułf bo ’ebîrîn
şîrîn munqad bî ew be fermanş
ne dił derê daşt êd bî dermanş
bełê ew şeş dang şox şabaz bêz
ne xeyałişda êd bî ke perwêz
be dîde û be gyan be dił yarş bo
şîrîn ter ce wêş tełebkarş bo
be řesim şahan ferengî û řûsî
bikeroş be ’eqid nîkaḧ ’urûsî
cey seseb daym ẍemze û naz mikerd
her řo xîşim alûd řêzey řa mikerd
bełê celay ehil danay dyarî
xas nîyen kero kes têz bazarî
metay herkesê xirîdarşen
ew zû bûreşo serfey karşen
dewłetmend ewen kałay wêş daym
çun řewaciş bo nekeroş qaym
xusrew perê wesił şîrîn diłber
herçend se’îş kerd nebî muyesser
bê ḧed pey wesiłş siza û meynet berd
ewca ẍemze û naz mûyê kem nekerd
wextê ’aciz bî xusrew ce naziş
ce tundî û tirşî, ce řêzey řaziş
derman kerd be sebir cerg parey wêş
daş be dest ’eqił tedbîr çarey wêş
şayed ke şîrîn firê şox û şeng
be řahê hemwar bawero be çeng
ce cayê henîç germ kero bazar
şayed ke ew şox pêş bibo hemwar
cey sebeb be germ şiłî biłind îqbał
ce danşimendan mipersa hewał
mer bignoş be dest şoxê ’enberîn
bwazoş ce qîn bê meylîy şîrîn