riftin şîrîn bih mida’in
From the Book:
Şîrîn û Xusrew
By:
Khana Qubadi (1704-1778)
2 minutes
665 views
axir ke řûy feřaş teqdîr
ce lîlî peřend şew çun beḧir qîr
kêşa mîşkîn ferş be řûy kafûrda
zułmet çun dûdî pexiş kerd be nûrda
şîrîn horêza wêney şem’ nûr
şî we pay serîr banûy şa destûr
watiş řoy ferda ’ezmim şikaren
meylim seyr û gişt sara û kosaren
herçend ke teklîf «ma la yitaqArabic»en
mizanû be tebi’ şerîfit şaqen
bełê çun xoş řefit seḧra newerden
tasey swarîy şebdêz sed gyan şîrîn
cenab ’ulyay meryem astîn
sîmîn sîmay saf, zułf û xał şîrîn
er zerûrş bo ferman pezîrim
bełê şeker řaz, tûtî teqrîrim
herçend xatirit be şewdêz weşen
nîhayet şewdêz tund û serkeşen
bigîřoş lucam pehlewan be sext
ta ser nekêşo be wext û bê wext
şîrîn êd şineft şikawa çun guł
bosa pay serîr banûy bo sunbuł
çun ce şołey şem ałay zeřîn bał
ne serkiwan seng direwşa çun lał
saraw serzemîn serapa yekdest
be ḧukim bêçûn ce meşrîq řeng best
nazk newhałan zułf bo ’enberîn
gişt cem bîn ce pay ewřeng şîrîn
şîrîn wextê dîş ew şeker řazan
ew nazenînan, ew nazk nazan
be çerb û nermî şîrîn zubanî
watiş «bisim alilhArabic» yaran canî
aro boy boy hewaş çun boy beheşten
’ezmem seyranen meylim guł geşten
êd ke şineftin ew newnemaman
poşaşan esbab wêney ẍułaman
swar bîn be řexiş û bê midara
řû kerdin şîrîn ne sara
çendê kerdişan seyr sara û ko
axir ke şîrîn şox sosen bo
pewaz kerd şîrîn şox poład sum
têzter ne xedeng şehabî encum
berşî ne dilê yaran hem derd
destûr newast, bê wefayî kerd
cew sebeb yaran gird bîn perêşan
poseşa zana espiş serkêşan
řostem řikaban muḧennek swar
dest wicłew xas, toř lał nîgar
herçend ke daşan dewrê firawan
be gerd şebdêz hîçkam neyawan
ta wext ẍurûb wadey aftab peř
peřanter ce nexiş peř dał guł zeř
ce demay şîrîn daşan qetrey dew
fa’îdeş nekerd, wext nîmeşew
gişt gêłanewe be şîn û zarî
waraşan ne çem esir mirwarî