napîda şidin şîrîn û xibir awirdin cihit mihîn banu
From the Book:
Şîrîn û Xusrew
By:
Khana Qubadi (1704-1778)
3 minutes
543 views
wextê řo ce ’ekis şew gêła ce řeng
yaran çun ẍunçey guł be xatir
ta yawan be qesir banûy cîhangîr
çun tofan sext seyl zemherîr
şîn firawan řestaxêz kerdin
zarî pey şîrîn, pey şebdêz kerdin
banûy meryem qedir nadîrey eyyam
cey şîrîn û zarî temam bî sersam
axir ce yaran zułf bo ’enberîn
be tałî şineft eḧwał şîrîn
herdû pencey wêş da we cemênda
cam mînaş meřd das we zemînda
be naxûn horkend çenî newhałan
ce qurs cemîn fîrozey xałan
biřîşan ce bîx gêsûy ’enberîn
şî kerdin zułfan pey şîn şîrîn
çun guł ’uryan bîn ne camey guł řeng
daşan be serda bûł û pare seng
ew řo řestaxêz pey şîrîn kirya
firê zułf û xał be ẍaret dirya
banû pey ew şox ’enberçe dara
be cay nîm teney zeřbafit xara
ce endoy derûn xestey xatir xar
poşa be qamet ser kelley dewar
megrewa û mwat ey nûr dîdem
ferzend ’ezîz dił pesendîdem
ye pey çêş wey tewr ey zore kerdî
pey çêş řencabî ey torey kerdî
îse we bê to zamim nasoren
dinya lêm tałen, bînaym koren
er min ce demay çun to new xêzê
şox şîrîn xał zułf ’enber bêzê
bipêkûn be şad tomar şahî
ẍerq bo dewłetim ta gah û mahî
axir waçe pêm gyanim fidêt bo
serim be sergerd ey mawa û cêt bo
ye kam kafir bî bey tewr ce řat berd
yekê bî azîz şêt û şeydat kerd
ye kam ḧerîf bî toş firîw na
yaney min ce dax dûrît şêw na
ew şew bey destûr ta be şebeq zerd
ew perê şîrîn şîn û zarî kerd
çun ce şołey wêş xurşîd enwar
kerdiş sezemîn narincî û gułnar
xas û ’am şehir temam bîn xemîn
cem bîn ne pay text banûy cem nigîn
demê şîn kerdin be cay şîrînda
bew cay fereḧ bexiş bo ’enberînda
banû wat ce new ey şîrînim řo
perîzadey şox ’enberînim řo
şabaz şeş dang saḧêb zengim řo
meḧbûb bê ’eyb şox û şengim řo
namedenîy kar, keçîy bextim řo
qełwezey zuxaw zam sextim řo
daney qîmetîy tarac berdem řo
mîwey guł baxçey lê newerdem řo
lawêz sengîy bê samanim řo
řołey nazenîn newcewanim řo
ladê bey destûr řestaxêz kerdiş
yawa we pay ’erş henasey serdiş
cew dema ew şox sitem řesîde
wat be hemdeman dił pesendîde
dîm be xaw cey wer be sed dax û derd
bazê ce destim bad horgirt û berd
çunke min cey xaw firê mitersam
te’bîreş hergîz ce kes nepersam
îse me’lûm bî ew bad şewdêzen
ew baze şîrîn řaz şeker řêzen
ce pey lwaşan fa’îdeş nyen
er xasen, er kest ha ce dest şyen
êd ke şineftin ce banû yaran
waraşan ne çem esrîn çun baran
be dîdey nimnak xatir perêşan
horêzan lwan be yaney wêşan