tuld şidin xisru
From the Book:
Şîrîn û Xusrew
By:
Khana Qubadi (1704-1778)
5 minutes
1050 views
şu’eray şîrîn nezim, şeker řêzey řaz
şêx nîzamî tewr, şefî’a endaz
be řesix xamey mîşkîn çun manî
bey tewr înşa kerd lewḧ me’anî
çun be «ḧesb al’emirArabic» qedîm lamewt
newşîrwan noşa mey ce şîşey fewt
be wîfq tewfîq zat îlahî
hurimz nîşt ne text feřbexiş şahî
be řesim ayîn newşîrwan pêş
me’mûr kerd be ’edił wîlayat wêş
kaffey mesakîn dewr řozgar
ce ḧusin sulûk ew feřřox tebar
her řo tepił ’eyş ’uşret mijendin
du’ay «gencel’erş» perêş mwendin
bełê ew cemşîd keyxisrew nigîn
ẍeyr ce firzendê neřûy ser zemîn
ce ’ersey dewran wêney eskender
hîçiş kem nebî ce genc û gewher
axir xudawend bexşindey bêçûn
kerîm bêbak, kar «kun feyekunArabic»
be feził ’emîm lameḧsûr wêş
firzend ’ezîz ferzane da pêş
firzend, kam firzend? feřřux serîrê
«refî’ alqedirArabic»ê, řewşen zemîrê
gîramî duřřê ce beḧir şahî
şem’ê ce enwar zat îlahî
şehenşa ce zewq ew «qirة al’înArabic»
ew «quة alzihirArabic» zerîf piř zeyn
şikawaş ce baẍ derûn ẍunçey dił
sucdey şukirş berd, xendan bî çun guł
fermaş ta çil řoj be sed şadî û naz
jendin be aheng ’îraqî û ḧîcaz
ce şadîy firzend şox mehpareş
nałey nay zeřřîn nirqey niqareş
ziřey cam senc, şîxey şeypûrş
seday řoyîn kûs, zemzemey şûrş
muyerd ne sewad to taq exzer
xaster ce řoy řezim dara û eskender
cewdima esḧab zîc û usturlab
exterşinasan erestû xîtab
seyr zayçey talî’iş kerdin
we lay şehenşah mesłeḧet berdin
watin firzendit feřiř şahîşen
nîşaney dewłet meh ta mahîşen
cew bon bizurgan bezim beheşt bêz
namşan nya xusrew perwêz
fermaş şehenşay bewr derya dił
awerdin şexsê çobtaş qabił
be çend řo çobtaş ew danay peyker
taşa bêşkê te nîşan zeř
berd ne kemanş çend yaqût lał
textiş řengîn kerd be şengerf ał
darçey dêbay xaray guł zeř
ben dezraçe ce yeşim û duř peř
ser bêşk perêş osay xetayî
wirast ce zeřbafit zemîn tełayî
naz bałişt ce çît xasey qełemkar
doşek ce sencab sosenîy zeřtar
dayey sîm endam semen bo endaz
tedarek kerdiş perêş be sed naz
bew tewr kerd neqaş ey neqiş dêrîn
tuřřey new’urûs suxen ’enberîn
pey xusrew be emir walîdey pak dîn
danay bełqîs qedir meryem astîn
ewweł kiławê ce zeřbafit tas
wirastin perêş ustadan xas
bazûş danebend mirwarî kerdin
ne řûy ḧaşyeş zumeřřed berdin
perê ûrtaxiş zeřgeran be taw
zeřkarîş kerdin danay mû şikaw
serlûleş ce lał daney bedexşan
řexşanter ce qurs řexşendey řexşan
text ce yek parçe baqût bûm zerd
te nîşan be duř feyrozey bêgerd
nyaşan ne ferq perwêz xusrew
direxşa sewad çun sitarey şew
kerdişan pêşda destey tawis peř
şîrînter ce tac tomar guł zeř
kirbasê bo mîşk taftey temam ał
qebayê ce lał, şewxawê ce lał
poşaşan be sewł qametiş be naz
pol newhałan şeker řêzey řaz
dayanş pêçaş bew ḧerîrewe
be dêbay zeřbafit be ’ebîrewe
nyaş ne bêşk, bêşk wêney xor
direxşa ne mehd gerdûn exzer
firawan be naz řenc çenîş berdin
be şîru şeker perwerdeş kerdin
hurimz her sa’et wêney ẍunçey guł
bo minya ne boş be diłwaz dił
pey çêş? ke firzend bînayî ’eynen
meşşatey řewşen ayney zeynen
ẍerez, ta ew tîfil newxêz sawa
sînin şerîfiş be çarde yawa
her řo zyater mibî şu’ûrş
xor mibî xecił ce şu’ley nûrş
wextê pexiş mibî kakoł ne pêłş
mibî sed şîrîn ermenî wêłş
daym her edeb şahî bî meşqiş
şêt mibî yosif ken’an ce ’eşqiş
tenteney zatiş wêney «tuhemten»
myawa be mułk xeta ta xuten
ce samş be feził zat îlahî
milerza pay gaw ce pişt mahî
xedengiş muyerd ce koy seng xar
çun nesîm ce lûl ḧełqey zułf yar
mişkawa şimşêr bonedeş ḧecer
çun sîney ’aşiq ne ebroy diłber
esḧab te’rîx ey şîrîn name
bey tewr da cewlan kumeyt xame
hurimz şa ke dîş firzendiş bey tewr
hemtaş kes nyen ne řûy ’ersey dewr
zana şikoy sam eskenderîşen
mertebey bizurg danşiwerîşen
ew «bizurg umêd» namş bî menşûr
aga bî ce ’îlim erestû destûr
tełeb kerd weber şehenşay ’adił
pey xusrew ew beḧir jerf dinya dił
xosrew lał poş sureyya serîr
necîb pakzad, eflatûn tedbîr
pey îstîfade cew deryay ferheng
pêka be sed naz ne damanş çeng
ce feyz ḧîkmet ew feřřux endam
ce ’îlim û ḧîkmet řasîx bî temam
hurimz dîş xusrew bey danşimendî
bey ’eqił û şu’ûr, bey dił pesendî
firawan kerdiş şukir xudawend
şîrîn bî ce laş şîrînter ce qend
pey ḧîfiz zatiş ce ah mezłûm
biřîş bêx zułim załman şû
pey řaḧetîy xełq řesmê qerar da
gał da cařçyan cař da be şarda
wey be kesêda be terz û tewrê
be bê newayê minmano cewrê!
cey sebeb be têẍ ’edałet çun cem
biřîş ḧełqey zułim, sîlsîley sitem