xencerî qani’ û heng
From the Book:
Deştî Germyan
By:
Qani (1898-1965)
2 minutes
654 views
ey hengî biçkolane!
bałdarî xawen lane
ebînim be řoj û şew
way le hewł û teqłedew
satêk aramit nîye
nazanim hewłit çîye?
kam baxçey piř le gułe
cêy goranîy bułbułe
tya egeřêy be azad
esûřêyto be diłşad
biçkole û zerd û sûrî
xawen hest û şi’ûrî
toş wek em gişt bałdare
lem herd û kohsare
bo nakewîte seyran?
řabwêrî wek ewan
tawê seyranî ser guł
satê hatwiçoy ser çił
kam gułê geş û cwane
bo to cêgey seyrane
çîye em hewł û hera
ne daykit hes, ne bira
ne xawenî samanî
ne xawen koşkî cwanî
ne dûkan û serat hes
bê xizim û xwêş û bê kes
boçî be çeşnî bułbuł
seyran nakey le naw guł?
ya wek baqî melekan
nageřêy le řûy asman!?
weramî heng:
kakî kurdî diłsûtaw!
wełamit bemo tewaw
seyran sûdêkî nîye
şitî bêsûdîş çîye?
seyran be karim naye
bo jîn nabê be maye
beharan wexte bimirim
bonî xoşî guł egirim
binêştî darî qezwan
le gwê çem û le kêwan
befrawî naw şaxekan
’etrî gułî baxekan
ko ekemo ta payîz
eykem be şanî temîz
temeł nanûm be hawîn
zistan des kem be girîn
le berî řencî sałim
le hêzî şanubałim
paşekewt exem hengiwîn
hengiwînî cwan û şîrîn
zistan eḧesêmewe
serbest esûřêmewe
birsî nakewm řengizerd
dawa nakem le namerd
min be řenc û kirdewe
goy hunerim birdewe
řencî hêzî bazûy xom
zistan bebê xem eyxom
herkes temeł bê le kar
nabînê pare û dînar
daym muḧtacî nane
małewmał sergerdane
ew kesane hawînan
řa’ebwêrin be seyran
zistan bê cêge û xwardin
ekewne çałî mirdin
xencer! gwê řagre lêm
bigre dił herçî ełêm
eger areq biřêjî
bo birsî û gêj û wêjî?!
heste bałit hełmałe
bo îş bîke be gałe
mewêste le îş kirdin
hetakû řojî mirdin
ebî be xawenî nan
eḧesêyto be asan